«Յստակօրէն կը պահանջենք, որ ԼՂ Ժողովուրդը ապահով վերադարձի երաշխիքներ ունենայ» կ՛ըսէ Եւրոպական Միութեան Բանբերը

Եւրոպական Միութեան արտաքին յարաբերութիւններու հարցերով գլխաւոր բանբեր Փեթեր Սթանոն պարզաբանած է Եւրոպական Միութենէն հնչող յայտարարութիւնները Հայաստանին Խաղաղութեան եւրոպական հիմնադրամին միջոցով աջակցելու, երկրին հետ մուտքի արտօնագիրներու ազատականացման շուրջ հոլովոյթ սկսելու վերաբերեալ:

Պրիւքսելի մէջ «Արմէնփրես»-ի թղթակիցին տուած բացառիկ հարցազրոյցին մէջ Փեթեր Սթանօ անդրադարձած է նաեւ Ազրպէյճանի արտաքին գործոց նախարարութեան յայտարարութեան, որով վերջինս Եւրոպական Միութիւնը մեղադրած էր շրջանին մէջ նոր տագնապ խթանելու մէջ եւ սպառնացած համարժէք պատասխանով:

Սթանօ խօսած է նաեւ Արցախէն բռնի տեղահանուած հայերու` միջազգային երաշխիքներու ներքեւ իրենց տուները վերադարձի կարեւորութեան մասին:

«Մենք շատ լաւ գիտենք, որ, թերեւս, հիասթափութիւն կամ քննադատութիւն կայ, որ Եւրոպական Միութիւնը բաւականաչափ աշխատանք չէ կատարած, սակայն ես պէտք է յիշեցնեմ, որ Եւրոպական Միութիւնը միջամտող ուժ չէ: Մեր տրամադրութեան տակ եղած գործիքները քաղաքական են եւ դիւանագիտական: Եղան յայտարարութիւններ, հրապարակային յայտարարութիւններ, որոնք կը դատապարտէին Ազրպէյճանի կողմէ Լեռնային Ղարաբաղի մէջ միակողմանի զինուորական գործողութիւնը:

«(…) Մենք շատ յստակ կը պահանջենք, որ Լեռնային Ղարաբաղի ժողովուրդը ապահով վերադարձի երաշխիքներ ունենայ: Գիտէք, անոնց ունեցուածքը չի կրնար բռնագրաւուիլ ուրիշին կողմէ: Պէտք է երաշխիքներ ըլլան այդ մարդոց անվտանգ վերադարձին համար, եթէ անոնք որոշեն վերադառնալ: Մենք նաեւ աւելցուցած ենք մեր մարդասիրական օգնութիւնը բռնի տեղահանուածներուն: Մենք կը շարունակենք պահանջել միջազգային մուտք եւ միջազգային ներկայութիւն Լեռնային Ղարաբաղի մէջ` իբրեւ ժողովուրդին համար այս երաշխիքներու մաս», յայտնած է Եւրոպական Միութեան արտաքին յարաբերութիւններու հարցով գլխաւոր բանբերը:

Սթանօ նաեւ յայտարարած է. «Եթէ Հայաստանի գերիշխանութիւնը չյարգուի, հետեւանքներ պիտի ըլլան անոնց համար, որոնք զայն կը խախտեն»:

Աղբիւրը` Ազդակ