Երեւանի Աւագանիի ընտրութիւններուն մասնակցեցաւ ընտրողներու 28,46

Կեդրոնական ընտրական յանձնաժողովը հրապարակած է բոլոր 475 ընտրատեղամասերուն մէջ ամփոփուած Երեւանի աւագանիի ընտրութիւններու քուէարկութեան նախնական արդիւնքները:

Ըստ այդմ՝ 32,57 տոկոսով առաջ է իշխող «Քաղաքացիական պայմանագիր» կուսակցութիւնը, երկրորդը «Ազգային առաջընթաց»-ն է՝ 18,89 տոկոսով, երրորդը՝ «Մայր Հայաստան» դաշինքը՝ 15,43 տոկոսով, 11,32 տոկոսով չորրորդն է «Հանրապետութիւն» կուսակցութիւնը, հինգերորդը «Հանրային ձայն» կուսակցութիւնն է՝ 9,68 տոկոսով։

Եթէ որեւէ կուսակցութիւն կամ դաշինք յաջողէր ստանալ 50 տոկոսէ աւելի քուէ, ապա ընտրական ցուցակի առաջին համարը օրէնքի ուժով կը դառնար քաղաքապետ։ Հակառակ պարագային քաղաքապետը կ'ընտրէ աւագանին՝ իր կազմէն։

Աւագանի մտնելու համար կուսակցութիւնները պէտք է հաւաքէին առնուազն 4, իսկ մասնակից միակ դաշինքը՝ «Մայր Հայաստան»-ը՝ 6 տոկոս քուէ։

Երեւանի աւագանիի ընտրութիւններու ընտրապայքար մտած է 14 քաղաքական ուժ, օրէնքի պահանջ է, որ աւագանիի մէջ ըլլայ առնուազն երեք ուժ։

Նշենք, որ Սեպտեմբեր 17-ին՝ ժամը 8.00-ին, ՀՀ ընտրական օրէնսգիրքով սահմանուած կարգով բացուած էին ընտրութիւններու համար ձեւաւորուած բոլոր 475 ընտրական տեղամասերը եւ ընդունած առաջին ընտրողները:

Ընտրողներու ելեկտրոնային գրանցման նպատակով օգտագործուած էր 1362 տեխնիկական սարքաւորում:

Ընտրութիւններու եւ քուէարկութեան վերաբերեալ լուսաբանում իրականացնելու համար հաւատարմագրուած էր 40 տեղական զանգուածային լրատւութեան միջոցներ: Ընտրութիւնները դիտարկելու համար հաւատարմագրուած էր նաեւ 2 միջազգային դիտորդական առաքելութիւն եւ 3 օտարերկրեայ ԶԼՄ։

Երեւան համայնքի ընտրողներու գրանցամատեանին մէջ հաշուառուած է 824 250 քաղաքացի, քուէարկութեան մասնակցած է 234 553 քաղաքացի կամ ընտրական իրաւունք ունեցող քաղաքացիներու 28.46%-ը։

Լուսադէմին Կեդրոնական ընտրական յանձնաժողովը հրապարակած է Երեւանի աւագանիի ընտրութիւններու քուէարկութեան նախնական արդիւնքները Երեւանի բոլոր 475 տեղամասերէն:

1. «Հանրային ձայն» կուսակցութիւն - 22 431 ընտրող (9.68%)

2. «Քաղաքացիական պայմանագիր» կուսակցութիւն - 75 463 ընտրող  (32.57%)

3. «Արդար Հայաստան» կուսակցութիւն - 2595 ընտրող (1.12%)

4. «Յաղթանակ» կուսակցութիւն -  3959 ընտրող (1.71%)

5. «Ուժը հայրենեաց» կուսակցութիւն - 1706 ընտրող (0.74%)

6. «Հայաստանի եւրոպական կուսակցութիւն - 2572 ընտրող (1.11%)

7. «Ազգային առաջընթաց» կուսակցութիւն - 43 765 ընտրող (18.89%)

8. «Յանուն սոցիալական արդարութեան» կուսակցութիւն - 780 ընտրող (0.34%)

9. «Հանրապետութիւն» կուսակցութիւն - 26 236 ընտրող (11.32%)

10. «Միացեալ Հայաստան» կուսակցութիւն - 1282 ընտրող (0.55%)

11. «Լուսաւոր Հայաստան» կուսակցութիւն - 4174 ընտրող (1.8%)

12. «Ժողովրդավարական Համախմբում» կուսակցութիւն - 2348 ընտրող (1.01%)

13. «Ապրելու երկիր» կուսակցութիւն - 8425 ընտրող (3.64%)

14. «Մայր Հայաստան» դաշինք - 35 739 ընտրող (15.43%):

Աղբիւրը` Արեւելք