Լաչինի միջանցքով եւ Աղտամով Ստեփանակերտ հասած են Կարմիր խաչի բեռնատարները
18 Սեպտեմբերի առաւօտեան տեղի ունեցած է Կարմիր խաչի բեռնատարներու միաժամանակեայ անցումը Աղտամ-Ստեփանակերտ եւ Գորիս-Ստեփանակերտ ճանապարհներով: Կարմիր խաչի Ստեփանակերտի գրասենեակէն յայտնած են, որ Աղտամ-Ստեփանակերտ ճանապարհով եկած բեռնատարը կը պարունակէ մանկական տակդիրներ եւ բժշկական պարագաներ: Բժշկական պարագաները պիտի յատկացուին հիւանդանոցներուն:
Լաչինի միջանցքով Ստեփանակերտ հասած է 23 թոն ալիւրով բեռնուած մէկ բեռնատար մեքենայ: Ըստ Արցախի տեղեկատուական շտաբի` Լաչինով եկած ալիւրը հայկական արտադրութեան է, իսկ Աղտամով եկած ապրանքները` ռուսական եւ զուիցերիական արտադրութեան:
«Չենք կարող ասել, թէ յաջորդ բեռը երբ է գալու: Մենք չէզոք միջնորդ ենք, եթէ վաղը խնդրանք լինի, որ այսինչ ապրանքը բերենք, դրա վրայ ենք աշխատելու: Մենք յոյս ունենք, որ սա վերջին անգամը չէ եւ դա պարբերական բնոյթ է կրելու, որպէսզի բնակչութիւնը կարողանայ իր կարիքները բաւարարել»,- «ՍիվիլՆեթ»ի հետ զրոյցին ըսած է Կարմիր խաչի Ստեփանակերտի գրասենեակի հանրային կապերու պատասխանատու Էթերի Մուսայէլեանը:
Նախօրէին յայտնի դարձաւ, որ Արցախը համաձայնած է Լաչինի միջանցքով եւ Աղդամ-Ստեփանակերտ ճանապարհով մարդասիրական բեռերու համաժամանակեայ տեղափոխման։
Աղբիւրը՝ Արեւելք
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
