Արցախէն բռնի տեղահանուած 28,120 անձեր Հայաստան մտան

Արցախէն Հայաստան մտնող բռնի տեղահանուածներու թիւը 26 Սեպտեմբերի դրութեամբ՝ հասաւ 28,120ի: Այս մասին տեղեկացուց Հայաստանի կառավարութիւնը՝ դիտել տալով, որ կեցութեան հարց ունեցողներուն համար կացարաններ յատկացուած են։

3253  անձերու կեցութեան վայրի հարցը լուծուած է. անոնցմէ ոմանք հաստատուեցան Սիւնիք` 1305, Վայոց Ձոր` 700, Գեղարքունիք` 833, Տաւուշ` 268, Արմաւիր` 147:

Ասոր զուգահեռ, «Արմէնփրէս»ի թղթակիցին հետ ունեցած զրոյցի մը ընթացքին, Ստեփանակերտի բնակիչ, լրագրող Գայիանէ Գէորգեան յայտնեց, որ իրենց անձնական ինքնաշարժով Արցախէն Հայաստան երթալ ուզողներէն շատերը վերադարձած են Արցախ՝ ծանր խճողումին պատճառով։

«Չորսից-հինգ ժամում մօտ 100 մետր ենք կարողացել առաջ գնալ, նոյնիսկ «մազի կամուրջ» չենք հասել: Կառավարութիւնից ասել են` սպասէք, եւ հաւաստիացրել են, որ բոլորս էլ նորմալ գնալու ենք», ըսաւ ան։

Անդրադառնալով Ստեփանակերտի մէջ տիրող իրավիճակին` Գէորգեան յայտնեց, որ քաղաքին մէջ տակաւին կան պենզինի կարգեր, աշխատող  հացի փուռեր կամ  վաճառքի կէտեր` նկատելի չեն, մարդիկ կ՛օգտագործեն մինչ այս տան մէջ մնացած սննդամթերքը: «Քիչ առաջ մի փռի կողքով էի անցնում: Նկատեցի, որ ալիւր կայ թափուած, ասեցին` ով ուզում է` կարող է վերցնել», աւելցուց Գէորգեան:

Աղբիւրը` Ասպարէզ