Ազրպէյճանցիները Բերձորի միջանցքի անցակէտին վրայ կ՛առեւանգեն երեք Արցախցի երիտասարդներ
Ազրպէյճանական կողմը Բերձորի միջանցքին մէջ գտնուող ապօրինի անցակէտին վրայ երէկ առեւանգած է ռուս խաղաղապահներուն ուղեկցութեամբ Արցախէն Հայաստան գացող 22-ամեայ Ալեն Նելսոնի Սարգսեանը, կը յայտնէ Արցախի տեղեկատուական շտապը:
Ըստ հաղորդագրութեան, Ալեն Սարգսեանը կը մեկնէր Երեւան` ուսումը շարունակելու: Առեւանգման պատճառներուն մասին որեւէ հաւաստի տեղեկութիւն տակաւին յայտնի չէ:
«Ազրպէյճան կը շարունակէ Արցախի ժողովուրդին հանդէպ ցեղասպանական քաղաքականութիւնը` անգամ մը եւս խախտելով միջազգային մարդասիրական իրաւունքի կանոնները: Դէպքին վերաբերեալ մանրամասնութիւնները պիտի յայտնուին աւելի ուշ», նշուած է հաղորդագրութեան մէջ:
Աւելի ուշ Արցախի մարդու իրաւունքներու պաշտպանի գրասենեակը հաղորդեց, որ եւս երկու հոգի` Վահէ Յովսէփեանը եւ Լեւոն Գրիգորեանը չեն հատած Բերձորի միջանցքին մէջ տեղակայուած ազրպէյճանական անցակէտը, սակայն կարելի չէ եղած անոնց հետ կապ հաստատել:
Երեք երիտասարդներն ալ Հայաստանի ուսումնական հաստատութիւններու ուսանողներ են:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
