ՄԱԿ-ը պէտք է քայլեր ընէ նաեւ արցախցի երեխաներու համար. Մարգարեանը ելոյթ ունեցած է Անվտանգութեան Խորհուրդէն ներս
Միաւորուած ազգերու կազմակերպութիւնը (ՄԱԿ) երեխաներու իրաւունքներու կոպիտ խախտումները կանխելու ու երեխաներու ֆիզիքական անվտանգութիւնը երաշխաւորելու պատասխանատւութիւն կը կրէ ամէնուր, ներառեալ՝ Լեռնային Ղարաբաղի մէջ։ ՄԱԿ-ի Անվտանգութեան խորհուրդէն ներս «Երեխաները եւ զինուած հակամարտութիւնները» թեմայով քննարկման ժամանակ այս յայտարարութիւնն ըրած է ՄԱԿ-ի մէջ ՀՀ մշտական ներկայացուցիչ Մհեր Մարգարեանը։
Ան կոչ ըրած է միջազգային հանրութեան քայլեր ձեռնարկելու Լեռնային Ղարաբաղի մէջ ապրող երեխաներու կեանքի պայմաններու հետագայ վատթարացումը կանխելու նպատակով։
Մարգարեան եւս մէկ անգամ յիշեցուցած է, որ 2022-ի դեկտեմբերէն Ատրպէյճանի կողմէ Արդարադատութեան միջազգային դատարանի վճռի խախտումով Լեռնային Ղարաբաղի շարունակուող շրջափակումը յատկապէս ծանր մարդասիրական հետեւանքներ առաջացուցած է երեխաներու համար։
«Անհնար է դարձել դպրոցների ու նախակրթարանների գործունէութիւնը, առողջապահական ծառայութիւնների մատուցումը, առաջացել է սննդի, դեղորայքի ու այլ կենսական ապրանքների խիստ կարիք»,-ըսած է ան։
Դեսպանը նշած է, որ Ատրպէյճանը կը խոչընդոտէ ՄԱԿ-ի կառոյցներու մուտքը Լեռնային Ղարաբաղ եւ տեղի բնակչութեան կարիքներու համապարփակ գնահատումը` շեշտելով, որ Լաչինի միջանցքի արգելափակումը եւ շուրջ 30 հազար երեխաներու ու անոնց ընտանիքներու շրջափակումը վերջիններուս իրաւունքներու ծանր խախտում է։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
