Եւրոպական Առաքելութիւնը Կապանի, Իջեւանի եւ Եղէգնաձորի մէջ գրասենեակներ պիտի բանայ
Եւրոպական Միութեան քաղաքացիական առաքելութիւնը կը պատրաստուի յաւելեալ երեք նոր դաշտային գրասենեակներ բանալու Կապանի, Իջեւանի եւ Եղէգնաձորի մէջ։ Այս մասին յայտարարեց առաքելութեան ղեկավար Մարկոս Ռիթըր` Մարտունիի մէջ, 1 Յունիսին ընդունելով Արեւելեան Եւրոպայի եւ Կեդրոնական Ասիոյ աշխատանքային խումբի Եւրոպական Միութեան պատուիրակութիւնը:
Ներկայացնելով առաքելութեան գործունէութիւնը` ան յայտկաէս նշեց, որ առաքելութիւնը կը կատարէ առաւել քան 300 հսկողութիւններ Գորիսի, Ջերմուկի եւ Մարտունիի մէջ գտնուող իր դաշտային գրասենեակներէն:
«Ամէն շաբաթ, հսկիչ-դիտորդները կը կտրեն առաւել քան 3800 քիլոմեթր տարածութիւն: Առաքելութիւնը մեկնարկած է աննախադէպ արագութեամբ` սկսելով իր գործողութիւնները այս Փետրուարին», ըսաւ Ռիթըր` շեշտելով` առաքելութեան նպատակն է՝ հասնիլ սահմանամերձ շրջաններու ապահովութեան կայունացման:
Վկայակոչելով Հայաստանի պաշտօնեաներու յայտարարութիւնները` Ռիթըր ըսաւ. «Առաքելութիւնը նպաստած է իրավիճակի որոշ կայունացման, այնուամենայնիւ, իրավիճակը կը մնայ անկայուն»։
Աղբիւրը` Ասպարէզ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
