«Կովերու պարտէզ»-ին հարցով Երուսաղէմի Հայոց Պատրիարքութեան մէջ մտահոգիչ վիճակ

Յորդանան ու Պաղեստինեան իշխանութիւնները միացեալ հաղորդագրութիւն մը հրապարակելով յայտարարեցին, որ որոշած են սառեցնել Երուսաղէմի հայոց պատրիարք Նուրհան արք. Մանուկեանի Երուսաղէմի եւ Յորդանանի մէջ Հայ առաքելական եկեղեցւոյ իբրեւ պատրիարք ճանաչումը: Այս մասին հաղորդեց «Մայատին» արբանեակային պատկերասփիւռի կայանը:

Անոնք այս որոշումը տուած են Երուսաղէմի հին քաղաքի հայկական թաղամասին մէջ կալուածներու նկատմամբ պատրիարքի առած քայլերը սրբագրելու շարք մը ջանքերէ եւ փորձերէ ետք:

Հաղորդագրութիւնը կը նշէ, որ այս որոշումը որդեգրուած է Յորդանանի Ապտալլա Բ. թագաւորին եւ Պաղեստինեան իշխանութեան նախագահ Մահմուտ Ապպասի ցուցմունքով, որովհետեւ պատրիարք Մանուկեանը գործադրած է քայլեր եւ գործարքներ, որոնք կ՛ազդեն սրբազան քաղաքի ապագային վրայ:

Այս քայլը որդեգրուած է Երուսաղէմի հին քաղաքի հայկական թաղամասին մէջ մեծ բաժին կազմող «Կովերու պարտէզ» անունով նշուած կալուածի եւ անոր շրջապատին վերաբերեալ գործարքին պատճառով:

Անոնք պատրիարք Մանուկեանէն պահանջած են կանգնեցնել որեւէ քայլ, որ կրնայ ազդել կալուածներու պատմական ու իրաւական կարգավիճակին վրայ եւ պիտի ազդէ անոնց բնոյթին վրայ` ժողովրդագրական եւ աշխարհագրական առումով, սակայն ան այդ պահանջներէն որեւէ մէկուն չէ ընդառաջած:

Էջմիածինի տեղեկատուական բաժանմունքի տնօրէն Եսայի քհնյ. Արթենեան «Նիուզ»-ին յայտնեց, որ Գարեգին Բ. կաթողիկոսը այս հարցով հեռաձայնային հաղորդակցութիւն ունեցած է Երուսաղէմի հայոց պատրիարք Նուրհան արք. Մանուկեանի հետ:

«Քննարկման ընթացքին պատրիարք սրբազանը վեհափառ հայրապետին տեղեկացուցած է, որ քայլեր կը ձեռնարկուին պատրիարքարանի իրաւունքներու պաշտպանութեան եւ խնդիրի բարւոք հանգուցալուծման համար:

«Ամենայն Հայոց կաթողիկոսը մշտական կապի մէջ է պատրիարքին հետ, եւ Մայր Աթոռ Սուրբ Էջմիածինը կարելի աջակցութիւնը պիտի ցուցաբերէ պատրիարքարանին այս հոլովոյթին մէջ: Այլ մանրամասնութիւններ այս պահուս նպատակայարմար չենք նկատեր հրապարակել», ըսած է ան:

Աղբիւր՝ Ազդակ