Պլինքըն. «Ուղիղ երկխօսութիւնն ու դիւանագիտութիւնը հարաւային Կովկասի մէջ կայուն խաղաղութեան միակ ուղին են»

Միացեալ Նահանգներու արտաքին գործոց նախարարութիւնը հաղորդագրութիւն հրապարակած է Միացեալ Նահանգներու արտաքին գործոց նախարար Էնթընի Պլինքընի եւ Հայաստանի Հանրապետութեան վարչապետ Նիկոլ Փաշինեանի հեռաձայնային հաղորդակցութեան  վերաբերեալ:

Հաղորդագրութեան մէջ կը նշուի. «Արտաքին գործոց նախարար Էնթընի Ճ. Պլինքընը այսօր զրուցած է Հայաստանի վարչապետ Նիկոլ Փաշինեանի հետ` ընդգծելով Հայաստան-Ազրպէյճան խաղաղութեան բանակցութիւններու կարեւորութիւնը եւ խոստացած Միացեալ Նահանգներու շարունակական աջակցութիւնը: Արտաքին գործոց նախարար Պլինքըն կրկնած է, որ ուղիղ երկխօսութիւնն ու դիւանագիտութիւնը Հարաւային Կովկասի մէջ կայուն խաղաղութեան միակ ուղին են: Ան իր երախտագիտութիւնը յայտնած է խաղաղութեան հոլովոյթին վարչապետի շարունակական նուիրուածութեան համար»:

Հայաստանի Հանրապետութեան վարչապետի աշխատակազմի տեղեկատուութեան եւ հասարակութեան հետ կապերու վարչութիւնը մէկ օր առաջ հաղորդած էր, որ Փաշինեան-Պլինքըն հեռաձայնային հաղորդակցութեան ընթացքին անդրադարձ կատարուած է շրջանին մէջ հաստատուած ռազմաքաղաքական եւ մարդասիրական կացութեան:

Փաշինեան ընդգծած է, որ Բերձորի միջանցքին մէջ ազրպէյճանական կողմի քայլերը միտուած են Լեռնային Ղարաբաղի մէջ ցեղային զտումներ կատարելու եւ Լեռնային Ղարաբաղը ամբողջութեամբ հայաթափելու իր քաղաքականութեան հետեւողական իրագործման: Ան շեշտած է Ազրպէյճանի կողմէ շրջանային անվտանգութիւնը խարխլող գործողութիւններուն միջազգային ընտանիքի համարժէք արձագանգի կարեւորութիւնը եւ գործօն քայլերու ձեռնարկումը` Արդարադատութեան միջազգային դատարանի վճիռի անվերապահ կատարման ուղղութեամբ:

Միտքեր փոխանակուած են նաեւ Հայաստան-Ազրպէյճան բանակցային հոլովոյթի, ներառեալ Ուաշինկթընի մէջ կայանալիք քննարկումներուն շուրջ:

Կողմերը կարեւոր նկատած են շրջանին մէջ կայունութեան ու խաղաղութեան ապահովման ուղղութեամբ հետեւողական ջանքերը:

Անդրադարձ կատարուած է մարդասիրական բնոյթի այլ հարցերու:

Նշենք, որ Ազրպէյճանի արտաքին գործոց նախարար Ճէյհուն Պայրամով Միացեալ Նահանգներու արտաքին գործոց նախարար Էնթընի Պլինքընի հրաւէրով աշխատանքային այցելութեամբ մեկնած է Միացեալ Նահանգներ:

«Այցելութեան ընթացքին կը նախատեսուի կատարել Ազրպէյճանի եւ Հայաստանի միջեւ խաղաղութեան համաձայնագիրի նախագիծի շուրջ բանակցութիւններու հերթական փուլը», նշուած է Ազրպէյճանի արտաքին գործոց նախարարութեան հրապարակած հաղորդագրութեան մէջ:

Նախապէս հաղորդուած էր, որ Հայաստանի արտաքին գործոց նախարար Արարատ Միրզոյեան 30 ապրիլին աշխատանքային այցելութեամբ պիտի մեկնի Ուաշինկթըն:

Աղբիւրը՝ Ազդակ