Հայոց Ցեղասպանութեան Թանգարան-հիմնարկին մէջ Ամերիկացի ուսուցիչներու վերապատրաստման ծրագիր կ՝իրականացուի

Ամերիկեան «Genocide Education Project» կազմակերպութիւնը՝ Հայոց Ցեղասպանութեան թանգարան-հիմնարկի հետ համագործակցելով՝ 2022 թ. Յուլիս 9-17 կազմակերպած է ամերիկացի ուսուցիչներու վերապատրաստման ծրագիր:

Հայոց Ցեղասպանութեան թանգարան-հիմնարկի փոխանցած տեղեկութիւններով՝ դասընթացը, որ տեղի կ՝ունենայ Յուլիս 10-15 ՀՑԹՀ գիտաժողովներու սրահին մէջ դասախօսութիւն-գործնական պարապմունք ձեւաչափով, մասնակիցներուն կը ներկայացնէ Հայոց Ցեղասպանութեան պատմական, իրաւական, ընկերային-հոգեբանական դիտանկիւնները, միաժամանակ ցոյց տալով այդ յանցագործութեան, անոր անպատժելիութեան ունեցած երկարաժամկէտ ազդեցութիւնը Հայաստանի Հանրապետութեան ներկայ քաղաքական, տնտեսական իրադրութեան վրայ: Առանձին դասաժամ յատկացուած է Արցախեան հիմնահարցին: Ծրագիրը կը ներառէ յատուկ մշակութային մաս, որ պիտի նպաստէ ուսուցիչներու կողմէ հայերու, հայոց պատմութեան եւ Հայաստանի վերաբերեալ ընդհանուր ճանաչողութեան բարձրացման:

«Այս տարի ծրագրին կը մասնակցի 15 ուսուցիչ՝ ԱՄՆ 15 տարբեր նահանգներէ: Անոնց մեծ մասը ունի հումանիտար ոլորտի մէջ դասաւանդելու 20 եւ աւելի տարիներու փորձ, ոմանք խմբագրած կամ մասնակցած են ցեղասպանութեան մասին ժողովածուներու հրատարակման, տարբեր թանգարաններու կրթական ծրագրերու մշակման»,- ըսուած է հաղորդագրութեան մէջ:

Ծրագիրին իբրեւ արդիւնք՝ մասնակիցները, ծանօթանալով Հայոց Ցեղասպանութեան թեմայի դասաւանդման մեթոտներուն, շեշտադրումներուն, GenEd կազմակերպութեան աջակցութեամբ պիտի կազմակերպեն վերապատրաստման նման ծրագիրներ եւ գործնական դասընթացներ իրենց նահանգներուն մէջ:

Աղբիւրը` Եռագոյն