Ռայի պատրիարքը կը զգուշացնէ երեսփոխանական եւ նախագահական ընտրութիւնները խոչընդոտելու փորձերէն

Մարոնի համայնքի Պշարա Ռայի պատրիարքը երէկ Պքերքէի մէջ նախագահեց կիրակի օրուան պատարագին, որուն ընթացքին իր արտասանած քարոզին մէջ հաստատեց յառաջիկայ մայիսին երեսփոխանական ընտրութիւններ կայացնելու խիստ կարիքը:

Ռայի պատրիարքը հաստատեց երկրին ազգային ու պարկեշտ նոր ընտրեալներ շնորհելու կարեւորութիւնը` աւելցնելով, որ նոր ու արդիական կուսակցութիւններ, դրական նոր ուժեր պէտք է կազմաւորուին:

Ան նշեց, որ խորհրդարանին համար կարիքը կայ պարկեշտ անձնաւորութիւններու, որպէսզի ան կարենայ կազմել այնպիսի կառավարութիւններ, որոնք նոր ոճով կ՛իշխեն երկրին:

Ռայի պատրիարքը հաստատեց, որ երեսփոխանական ընտրութենէն ետք իրենք կը սպասեն նախագահական ընտրութեան կայացումին, եւ ատիկա կարելի է Լիբանանին բացարձակ նուիրուածութեան շրջագիծին մէջ: «Նուիրուածութիւնը չէզոքութեան նման է, եւ անոնք հիմնական երկու պայմաններ են ազգային գործակցութեան իրականացման ու հաւասարութեան կերտման», ըսաւ ան:

Ռայի պատրիարքը կոչ ուղղեց լիբանանեան քաղաքական ուժերուն եւ կուսակցութիւններուն Լիբանանի գերագոյն շահերը գերադասելու:

Ան զգուշացուց երեսփոխանական եւ նախագահական ընտրութիւնները խոչընդոտելու փորձերէն:

Ռայի պատրիարքը կոչ ուղղեց վերջ տալու քինախնդրութեան եւ առաջնահերթութիւնները շրջելու փորձերուն` աւելցնելով, որ նման քայլեր կը մտահոգեն լիբանանցիներն ու Լիբանանի եղբայր եւ բարեկամ երկիրները:

Ան հաստատեց, որ անձնական կամ կասկածելի ոչ մէկ պատճառ կարելի է գտնել յետաձգելու կամ ջնջելու երեսփոխանական ընտրութիւնները` աւելցնելով, որ նման որեւէ քայլ սահմանադրութեան լուրջ խախտում կը նկատուի:

Աղբիւրը՝ Ազդակ