Որոնել

Vatican News
Աֆղանցիներ Աֆղանցիներ 

Եւրոպական Միութիւնը գաղթականներու ընդունման համար աջակցութիւն պիտի տրամադրէ Աֆղանիստանի դրացի երկիրներուն

Պորել ընդգծած է, որ Եւրոպական Միութեան անհրաժեշտ է «սորվիլ միասին աշխատիլ եւ ամրապնդել ռազմավարական ինքնավարութեան գաղափարը»:
Ունկնդրէ լուրը

Եւրոպական Միութիւնը ելեւմտական օգնութիւն պիտի տրամադրէ Աֆղանիստանի դրացի երկիրներուն` գաղթականները տեղաւորելու համար: «Արմէնփրես», յղում կատարելով ԹԱՍՍ լրատու գործակալութեան, կը տեղեկացնէ, որ 30 օգոստոսին «Քորիերէ տելլա Սերա» օրաթերթին մէջ հրապարակուած հարցազրոյցին մէջ այդ մասին յայտարարած է Եւրոպական Միութեան արտաքին քաղաքականութեան եւ անվտանգութեան բարձրագոյն յանձնակատար Ժոզեփ Պորել:

«Եւրոպայի կարողութիւնները ունին իրենց սահմանները, առանց սերտ համագործակցութեան ոչինչ կարելի է ընել: Դրացի երկիրները հոլովոյթին մէջ աւելի շատ եւ աւելի շուտ պիտի ներգրաւուին, քան Եւրոպան: Այնպէս որ, այո՛, ատիկա նաեւ կը նշանակէ այլ երկիրներուն ֆինանսական օժանդակութեան տրամադրում, ինչպէս ատիկա եղաւ Թուրքիոյ հետ», յայտարարած է եւրոպական դիւանագիտութեան պետը:

Անոր կարծիքով` Եւրոպան պէտք է դասեր քաղէ Աֆղանիստանի կացութենէն, որպէսզի ամրապնդէ «անդրատլանտեան յարաբերութիւնները եւ զանոնք դարձնէ աւելի հաւասարակշռուած»:

Պորել ընդգծած է, որ Եւրոպական Միութեան անհրաժեշտ է «սորվիլ միասին աշխատիլ եւ ամրապնդել ռազմավարական ինքնավարութեան գաղափարը»:

«Եւրոպական Միութեան ռազմավարական կողմնացոյցին մէջ» «արտաքին քաղաքական ռազմավարական հայեցակարգին մէջ» մենք կ՛առաջարկենք ստեղծել արագ հակազդումի ուժերու եւրոպական ստորաբաժանում, որ պիտի կարենայ արագօրէն գործել արտակարգ կացութիւններու մէջ: Եւրոպական Միութիւնը պէտք է կարելիութիւններ ունենայ սեփական շահերու պաշտպանութեան համար միջամտելու, երբ ամերիկացիները չեն ուզեր միջամտել», ընդգծած է ան:

Աղբիւրը` «Ազդակ»

01/09/2021, 08:20