Որոնել

Vatican News
Մայր Աթոռում նշուեց Սուրբ Աստուածածնի Վերափոխման տօնը Մայր Աթոռում նշուեց Սուրբ Աստուածածնի Վերափոխման տօնը 

Մայր Աթոռում նշուեց Սուրբ Աստուածածնի Վերափոխման տօնը

Աստուածամայրը կենդանի է, Նա մեզ հետ է: Քրիստոս այս պահին գալիս է Աստուածամօրը փոխադրելու: Վաղը նոյնպէս Աստուածամայրը մեզ հետ է լինելու, բոլորիս սրտերում:

Օգոստոսի 15-ին Հայաստանեայց Առաքելական Սուրբ Եկեղեցին տօնախմբեց Սուրբ Աստուածածնի Վերափոխման տօնը: Այս բերկրառատ օրուայ առիթով, Մայր Աթոռի միաբանութիւնը Սուրբ Գայանէ վանքում մասնակցեց Պատարագի սրբազան արարողութեանը: Պատարագիչն էր Մայր Աթոռ Սուրբ Էջմիածնի միաբան, Հայաստանի Աստուածաշնչային ընկերութեան գլխաւոր քարտուղար Գերաշնորհ Տ. Եզնիկ արքեպիսկոպոս Պետրոսեանը:

Սրբազան Հայրը, իր քարոզում անդրադառնալով տօնի խորհուրդին, մասնաւորապէս նշեց. «Երկու հազար տարի առաջ Աստուածամայրը մեզ չլքեց եւ չգնաց, այլ ապրում է մեր մէջ, ապրում է բոլոր մայրերի մէջ, եւ մենք անցեալով չենք խօսում Աստուածամօր մասին, որովհետեւ նա այսօր մեզ հետ է»:

Այնուհետեւ Սրբազան Հայրը, անդրադառնալով առաջին դարում տեղի ունեցած իրադարձութիւններին, խօսեց Սուրբ Աստուածածնի կերպարի եւ փրկագործութեան պատմութեան մէջ նրա ունեցած դերակատարութեան մասին, ինչպէս նաեւ Վերափոխման տօնի խորհուրդին` պատգամելով ներկաներին ապրել Վերափոխման խորհրդի իրականութեան մէջ` խնդրելով Սուրբ Կոյսի բարեխօսութիւնը:

Եզնիկ Սրբազանը, յատուկ անդրադարձ կատարեց որդեկորոյս մայրերին` վերջիններիս կրած ծանրագոյն ցաւերն ու վշտերը համեմատելով Աստուածամօր տառապանքների հետ․ «Աստուածամօր նման բազմաթիւ մայրեր կան այսօր Հայաստանում, որոնք զաւակներ կորցրեցին, որոնք ունեն այն նոյն մայրական ցաւը, ինչպիսին Աստուածամայրն ունէր, եւ որոնց համար Աստուածամայրն իբրեւ օրինակ կարող է լինել` դիմագրաւելու այն ցաւերին, որոնք այսօր ունեն իրենց հոգում եւ իրենց սրտում:

Այս մտածումներով մաղթենք, որ ամոքուեն վէրքերը` հոգեւոր վէրքերը մեր բոլոր մայրերի, ովքեր որդեկորոյս են այսօր, ամոքուեն վէրքերն այն բոլոր կանանց, ովքեր իրենց ամուսիններին կորցրեցին եւ ամոքուեն վէրքերն այն բոլոր երեխաների, ովքեր իրենց հայրերին կորցրեցին: Թող Աստուածամայրը ձեր որդիների հետ լինի այժմ եւ միշտ եւ յաւիտեանս յաւիտենից․ Ամեն»:

Վերջում Պատարագիչ Սրբազանը, աղօթք վերառաքելով առ Աստուած, եւս մէկ անգամ հաստատեց, որ Աստուածամայրը կենդանի է, Նա մեզ հետ է: Քրիստոս այս պահին գալիս է Աստուածամօրը փոխադրելու: Վաղը նոյնպէս Աստուածամայրը մեզ հետ է լինելու, բոլորիս սրտերում:

Յաւարտ Սուրբ Պատարագի, հանդիսապետութեամբ Մայր Աթոռ Սուրբ Էջմիածնի Լուսարարապետ Գերաշնորհ Տ․ Մուշեղ եպիսկոպոս Բաբայեանի, Սուրբ Տրդատի բաց խորանին կատարուեց Խաղողօրհնէքի արարողութիւնը:

Վերջում օրհնուած խաղողի ողկոյզները բաժանուեցին հաւատաւոր ժողովրդին:

Քաղուած «Արեւելք» էն

15/08/2021, 20:49