Որոնել

Vatican News
2021.06.16 Karekin II CNEWA rappresentanti 2021.06.16 Karekin II CNEWA rappresentanti 

Ամենայն Հայոց Կաթողիկոսն ընդունեց Մերձաւոր Արեւելքի կաթողիկէ բարեկեցութեան ընկերութեան ներկայացուցիչներին

Հանդիպմանը Հայր Սուրբը Ամենայն Հայոց Կաթողիկոսին ներկայացրեց հիւրերին՝ տեղեկութիւններ փոխանցելով կազմակերպութեան գործունէութեան մասին։

Յունիսի 15-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Մերձաւոր Արեւելքի Կաթողիկէ Բարեկեցութեան Ընկերութեան (CNEWA) ներկայացուցիչներ Թովմաս Վարգեզէնին եւ Միքայէլ Լա Սիւիտանին` ուղեկցութեամբ Հայաստանի, Վրաստանի, Ռուսաստանի եւ Արեւելեան Եւրոպայի Հայ Կաթողիկէ եկեղեցու առաջնորդի օգնական Հոգեշնորհ Տ․ Նարեկ վարդապետ Մնոյեանի։

Ունկնդրէ լուրը

Հանդիպմանը Հայր Սուրբը Ամենայն Հայոց Կաթողիկոսին ներկայացրեց հիւրերին՝ տեղեկութիւններ փոխանցելով կազմակերպութեան գործունէութեան մասին։

Զրոյցի ընթացքում խօսուեց Հայոց Եկեղեցու տարբեր կառոյցների կողմից հոգեփրկչական առաքելութեանը զուգահեռ՝ արցախեան երկրորդ պատերազմի արհաւիրքները կրած հայ ժողովրդի զաւակներին ցուցաբերուող շարունակական մարդասիրական եւ սոցիալական օգնութեան մասին։ Այս առնչութեամբ Հայոց Հայրապետն իր գնահատանքը փոխանցեց կազմակերպութեան ներկայացուցիչներին՝ պատերազմի հետեւանքով տուժած հայորդիներին աջակցութիւն եւ օգնութիւն ցուցաբերելու համար։ Նորին Սրբութիւնն երախտագիտութեամբ անդրադարձաւ նաեւ տարբեր միջազգային կառոյցների կողմից դժուարին այս շրջանում Հայաստանին ու Արցախին ցուցաբերուած զօրակցութեանը։

Վեհափառ Հայրապետը խօսեց ներկայ մարտահրաւէրների մասին՝ մասնաւորապէս հիւրերի ուշադրութիւնը հրաւիրելով Հայաստանի սահմանների նկատմամբ ոտնձգութիւնների փաստին, ինչպէս նաեւ Ադրբեջանի վերահսկողութեան տակ յայտնուած տարածքներում հայկական հոգեւոր, մշակութային ժառանգութեան հանդէպ վայրագ վերաբերմունքին։

Վերջում Ամենայն Հայոց Կաթողիկոսը պատասխանեց ներկաների հարցերին, որոնք վերաբերում էին հայ ռազմագերիների ազատ արձակման, վիրաւոր զինուորներին եւ տեղահանուած ընտանիքներին օգնելու ուղղութեամբ Մայր Աթոռի կողմից տարուող աշխատանքներին։ 

Քաղուած «Արեւելք»էն

16/06/2021, 08:24