Իսրայէլ կը ռմբակոծէ Լիբանանը` հակադարձելով Իսրայէլեան շրջաններու հրթիռակոծումին
Չորեքշաբթի, 19 մայիսին, յետմիջօրէին իսրայէլեան ուժեր ռմբակոծեցին Լիբանանը` իբրեւ պատասխան լիբանանեան հողերէն դէպի արեւմտեան Գալիլիա արձակուած չորս հրթիռներուն:
Իսրայէլեան ուժեր Աքքայի եւ Հայֆայի մէջ կոչ ուղղեցին բնակիչներուն ուղղուելու ապաստանարաններ:
Իսրայէլի կողմէ ռմբակոծումը թիրախ դարձուց Շամաա գիւղաքաղաքը:
Հարաւային Լիբանանի մէջ տեղակայուած ՖԻՆԻՒԼ-ի միջազգային խաղաղապահ ուժերու պաշտօնական բանբեր Անտրէա Թինընթի յայտնեց, որ ՖԻՆԻՒԼ-ի հրամանատարը ուղղակի կապի մէջ է լիբանանեան եւ իսրայէլեան կողմերուն հետ, եւ զանոնք կը մղէ ինքնազսպումի ենթարկուելու:
Երեկոյեան լիբանանեան բանակը յայտնեց, թէ Սըտտիքին գիւղաքաղաքի մօտակայքը գտած է հրթիռներու մարտկոցներ, որոնց կազմաքանդումի աշխատանքին լծուած է:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ