Որոնել

Vatican News
Լիբանան, բողոքի ցոյցեր Լիբանան, բողոքի ցոյցեր  (AFP or licensors)

Բողոքի ցոյցերը շարունակուելով վերածուեցան «բարկութեան երկուշաբթի»-ի` անդամալուծելով երկիրը

«Բարկութեան երկուշաբթի»-ին ընթացքին ցուցարարները բախումներ ունեցան լիբանանեան բանակին եւ ներքին ապահովութեան ուժերուն հետ, որոնք կը փորձէին վերաբանալ փակուած ճամբաները:

Լիբանանեան քաղաքական, տնտեսական, ելեւմտական եւ ընկերային տագնապներուն լուծման ոչ մէկ նշոյլի գոյութեան զուգահեռ, լիբանանեան տարբեր շրջաններուն մէջ երէկ` երկուշաբթի, 8 մարտին, բողոքի ցոյցերը շարունակուեցան եւ վերածուեցան «Բարկութեան երկուշաբթի»-ի, որ պիտի տեւէ ամբողջ շաբաթ մը:

Երէկ առաւօտեան կանուխ ժամերէն սկսեալ ցուցարարները տարբեր շրջաններու մէջ հրկիզուող անիւներով փակեցին մայրուղիներ, ներքին փողոցներ, հրապարակներ` պահանջելով բարելաւել երկրի պայմանները:

Ցուցարարներէն ոմանք կոչ ուղղեցին իշխանութեան` հեռանալու իրենց պաշտօններէն, պահանջեցին` դատավարութեան ենթարկել զանոնք, ուրիշներ` հանրապետութեան նախագահին հրաժարականը: Անոնք բողոքեցին սղաճին, աղքատութեան, հետզհետէ վատթարացող տնտեսական կացութեան եւ լիբանանեան դրամանիշի արժեզրկումին դէմ, երբեմն անդրադառնալով նաեւ քաղաքական եւ ռազմավարական օրակարգերու, ինչպէս` մարոնի համայնքի Պշարա Ռայի պատրիարքին յայտարարած չէզոքութեան կեցուածքին զօրակցութիւն եւ արտայայտութիւններ Դիմադրութեան զէնքին դէմ` զայն նկատելով երկրին մէջ ապօրինաբար գործող զէնք:

«Բարկութեան երկուշաբթի»-ին ընթացքին ցուցարարները բախումներ ունեցան լիբանանեան բանակին եւ ներքին ապահովութեան ուժերուն հետ, որոնք կը փորձէին վերաբանալ փակուած ճամբաները:

Այս շրջագիծին մէջ առաւօտ կանուխ հիւսիսային Լիբանանի մէջ փակուեցան Հալպայի եւ Ապտէի հրապարակները, Ուատի Ժամուսը, Մոհամմարան, Պըրժ Արապը, Փալման, Սալամ կամուրջը, Հայքալիէն, Պըտտաուին, Պըհսասը, Թրիփոլիի բոլոր ճամբաները, Շեքքա-Հըրի մայրուղին` երկու ուղղութեամբ:

Քաղուած «Ազդակ»էն

09/03/2021, 08:39