Որոնել

Vatican News
Եւրոպական Խորհրդարանը Եւրոպական Խորհրդարանը 

Եւրոպական Խորհրդարանը խիստ կերպով կը քննադատէ Լեռնային Ղարաբաղի մէջ Թուրքիոյ ապակայունացնող դերը

Եւրոպական խորհրդարանը բանաձեւով նաեւ ընդգծած է, որ յարատեւ կարգաւորումը տակաւին չէ գտնուած, եւ խաղաղութեան հասնելու շրջանի ապագայ իրաւական կարգավիճակի որոշման հոլովոյթը պէտք է գործադրուի ԵԱՀԿ-ի Մինսքի խմբակի համանախագահութեան ծիրին մէջ եւ հիմնուած ըլլայ վերջինիս Հիմնարար սկզբունքներուն վրայ:
Ունկնդրէ լուրը

Եւրոպական խորհրդարանը 20 յունուարին որդեգրած է «Ընդհանուր արտաքին եւ անվտանգային քաղաքականութիւն» եւ «Ընդհանուր անվտանգային ու պաշտպանական քաղաքականութիւն» տարեկան զեկուցում-բանաձեւերը: Անոնց առաջինին մէջ առանձին կէտով անդրադարձ կը կատարուի Լեռնային Ղարաբաղի խնդիրին:

«Արմէնփրես»-ի հաղորդումով` Եւրոպական խորհրդարանը բանաձեւով ի գիտութիւն ընդունած է Լեռնային Ղարաբաղի մէջ զինուորական գործողութիւններու դադրեցման վերաբերեալ Հայաստանի, Ազրպէյճանի եւ Ռուսիոյ ղեկավարներու 9 նոյեմբերի եռակողմ յայտարարութիւնը, խիստ քննադատած է խաղաղ բնակչութեան եւ քաղաքացիական ենթակառոյցներու, սրբավայրերու թիրախաւորումը, տարանջատուող ռումբերու օգտագործումը, եւ այդ առնչութեամբ Հայաստանին ու Ազրպէյճանին կոչ ուղղած է վաւերացնելու տարանջատուող զինատեսակներու մասին հռչակագիրը:

Եւրոպական խորհրդարանը բանաձեւով նաեւ ընդգծած է, որ յարատեւ կարգաւորումը տակաւին չէ գտնուած, եւ խաղաղութեան հասնելու շրջանի ապագայ իրաւական կարգավիճակի որոշման հոլովոյթը պէտք է գործադրուի ԵԱՀԿ-ի Մինսքի խմբակի համանախագահութեան ծիրին մէջ եւ հիմնուած ըլլայ վերջինիս Հիմնարար սկզբունքներուն վրայ:

Նշուած է, որ Լեռնային Ղարաբաղի մէջ պէտք է ապահովուի հայ բնակչութեան եւ հայկական մշակութային ժառանգութեան անվտանգութիւնը, ներքին տեղահանուած անձերու եւ գաղթականներու` իրենց նախկին բնակութեան վայրեր անվտանգ վերադարձը:

Բացի ատկէ, բանաձեւով կոչ ուղղուած է պատշաճ ուսումնասիրութեան ենթարկելու մեղաւորները:

Բանաձեւի առանձին` 38-րդ կէտով Եւրոպական խորհրդարանը խստօրէն քննադատած է Թուրքիոյ ապակայունացնող դերը, որ առաւել եւս կը խաթարէ Հարաւային Կովկասի մէջ փխրուն կայունութիւնը: Թուրքիոյ կոչ ուղղուած է զերծ մնալու Լեռնային Ղարաբաղի տագնապին մէջ որեւէ միջամտութենէ, ներառեալ` Ազրպէյճանին զինուորական օգնութիւն առաջարկելու տեսքով, ետ կանգնելու իր ապակայունացնող գործողութիւններէն ու գործօն կերպով խթանելու խաղաղութիւնը: Քննադատուած է Թուրքիոյ կողմէ օտարերկրեայ ահաբեկիչ զինեալներու Սուրիայէն եւ այլ վայրերէն դէպի Լեռնային Ղարաբաղ տեղափոխումը:

«Ընդհանուր անվտագային ու պաշտպանական քաղաքականութիւն-2020 թուական. իրականացման վերաբերեալ տարեկան զեկուցում» բանաձեւին մէջ Լեռնային Ղարաբաղի վերաբերեալ առանձին պարբերութեան մը մէջ կը նշուի.«Եւրոպական խորհրդարանը կ՛ողջունէ Լեռնային Ղարաբաղի տագնապի գօտիին մէջ զինուորական գործողութիւններու դադրեցումը»:

Այնուհետեւ մտահոգութեամբ ընդգծուած է տագնապին երրորդ երկիրներու զինուորական ներգրաւուածութիւնը, յատկապէս Թուրքիոյ միջամտութիւնն ու ապակայունացնող դերակատարութիւնը, կոչ ուղղուած է իրականացնելու միջազգային ուսումնասիրութիւն օտարերկրեայ զինեալներու ներկայութեան, տարրանջատուող զինատեսակներու եւ ֆոսֆորային ռումբերու օգտագործման հարցերու առնչութեամբ:

Եւրոպական Միութեան եւ միջազգային կառոյցներուն կոչ ուղղուած է չարտօնելու Լեռնային Ղարաբաղի մէջ պատերազմական յանցագործութիւններու եւ Լեռնային Ղարաբաղի տագնապին մէջ արգիլուած զինատեսակներու կիրարկման անպատժելիութիւնը, պնդած է այն մօտեցումը, որ անհրաժեշտ է արտօնել մարդասիրական աջակցութեան մատակարարումը վնասուածներուն, առանց ձգձգումներու իրականացնել գերիներու ու վնասուածներու փոխանակումը եւ պահպանել Լեռնային Ղարաբաղի մշակութային ժառանգութիւնը:

«Ընդհանուր արտաքին եւ անվտանգային քաղաքականութիւն-2020 թուական. իրականացման վերաբերեալ տեւական զեկուցում» բանաձեւին մէջ կոչ կ՛ուղղուի Եւրոպական Միութեան դրացնութեան նկատմամբ ստանձնելու ռազմավարական պատասխանատուութիւն եւ կատարել ժամանակային առումով աւելի պատեհ, աւելի աշխուժ ու արդիւնաւէտ դերակատարութիւն` շարունակուող լարուած իրավիճակներու մէջ ու տագնապներու մէջ միջնորդութեան ու անոնց խաղաղ լուծման, հետագայ տագնապներու կանխարգիլման նպատակով: Ի թիւս այլ ձեւաչափերու, վերահաստատուած է ամուր աջակցութիւնը ԵԱՀԿ-ի Մինսքի խմբակին, ընդգծուած է, որ Արեւելեան Գործընկերութեան եւ Եւրոպական Միութեան դրացի այլ երկիրներու հետ համագործակցութիւնը պէտք է առաջնահերթ ըլլայ Եւրոպական Միութեան ընդհանուր արտաքին եւ անվտանգային քաղաքականութեան համար` պայմանաւորուած այդ երկիրներու զարգացման եւ ժողովրդավարացման գործին մէջ Եւրոպական Միութեան կենսական շահով: Եւրոպական յանձնաժողովին եւ արտաքին գործողութեան եւրոպական գործակալութեան կոչ ուղղուած է, ի թիւս այլ ուղղութիւններու, ամրապնդել մարդոց միջեւ հաղորդակցութիւները, ներառեալ` մուտքի արտօնագիրներու դրութեան դիւրացման եւ ազատականացման միջոցով, երբ բոլոր պահանջները կատարուած են:

Քաղուած «Ազդակ» էն

22/01/2021, 09:32