Միացեալ Նահանգներ, Ռուսիա Եւ Ֆրանսա կը պահանջեն օտարերկրեայ վարձկանները անյապաղ դուրս բերել Լեռնային Ղարաբաղի տարածքէն
ԵԱՀԿ-ի Մինսքի խմբակի համանախագահ երկիրներ Միացեալ Նահանգները, Ռուսիան եւ Ֆրանսան Միացեալ յայտարարութիւն հրապարակելով կոչ ուղղեցին Լեռնային Ղարաբաղի շրջանէն անյապաղ դուրս բերելու օտարերկրեայ վարձկանները: Այս մասին կը նշուի համանախագահ երկիրներու պատուիրակութիւններու ղեկավարներու` Ռուսիոյ եւ Ֆրանսայի արտաքին գործոց նախարարներու, Միացեալ Նահանգներու արտաքին գործոց նախարարի տեղակալի երէկ հրապարակած յայտարարութեան մէջ:
Միջնորդ երկիրները Հայաստանին ու Ազրպէյճանին կոչ կ՛ուղղեն շարունակելու լիարժէքօրէն կատարել 9 նոյեմբերին եռակողմ յայտարարութեամբ, նաեւ զինադադարի վերաբերեալ մինչ այդ ստանձնած իրենց բոլոր պարտաւորութիւնները:
Համանախագահ երկիրները նաեւ Երեւանը եւ Պաքուն յորդորած են օգտուիլ հաստատուած զինադադարէն ու միջնորդներու հովանիին տակ բանակցութիւններ սկսիլ տեւական ու կայուն խաղաղութեան հասնելու համար:
Այդ ծիրին մէջ անոնք կոչ կ՛ուղղեն կարելի եղածին չափ շուտ շրջանին մէջ հիւրընկալել համանախագահներն ու պարտաւորուիլ առարկայական բանակցութիւններ վարել համաձայնեցուած ժամանակացոյցով` բոլոր չլուծուած խնդիրները լուծելու համար:
Ռուսիան, Ֆրանսան ու Միացեալ Նահանգները կարեւոր նկատած են նաեւ պատերազմական գերիներու եւ զոհուածներու մարմիններու փոխանակումը, կրօնական ու պատմական ժառանգութեան պաշտպանութիւնը, տեղահանուածներու վերադարձին համար բարենպաստ պայմաններ ստեղծելը:
Քաղուած «Ազդակ»էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
