Որոնել

Vatican News
Ամենայն Հայոց Կաթողիկոսը հանդիպում ունեցաւ Մայր Աթոռի սարկաւագաց դասի հետ Ամենայն Հայոց Կաթողիկոսը հանդիպում ունեցաւ Մայր Աթոռի սարկաւագաց դասի հետ 

Ամենայն Հայոց Կաթողիկոսը հանդիպում ունեցաւ Մայր Աթոռի սարկաւագաց դասի հետ

Այս առիթով Նորին Սրբութիւնն իր գնահատանքը յայտնեց սարկաւագաց դասին նուիրեալ ծառայութեան համար՝ մասնաւորաբար նշելով գնդերեց սարկաւագների՝ Հայոց բանակին մատուցած օգտաշատ ծառայութեան մասին

Դեկտեմբերի 28-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Սուրբ Ստեփանոս Նախավկայի տօնի առիթով (այս տարի դեկտեմբերի 26-ին) հանդիպում ունեցաւ Մայր Աթոռ Սուրբ Էջմիածնի սարկաւագաց դասի հետ։

Սարկաւագները Հայոց Հովուապետին ողջունեցին «Ստեփանոս, քաղցրիկ տատրակ» տաղի երգեցողութեամբ, այնուհետեւ Տէրունական աղօթքից յետոյ Մայր Աթոռի միաբան Գերաշնորհ Տ․ Մուշեղ եպիսկոպոս Բաբայեանը կրտսեր միաբանների անունից դիմեց Նորին Սրբութեանը՝ ընդգծելով, որ սարկաւագաց դասն ի մի է հաւաքուել ստանալու Հայոց Հայրապետի օրհնութիւնը, լսելու նրա հայրական խրատներն ու յորդորները՝ առաւել նախանձախնդրութեամբ շարունակելու իրենց ծառայութիւնը Հայոց Եկեղեցու անդաստանում։ Մուշեղ եպիսկոպոսն իր խօսքում նաեւ անդրադարձաւ արցախեան պատերազմի օրերին գնդերեց սարկաւագների քաջարի ծառայութեանը, որով հաստատեցին Սուրբ Ստեփանոս Նախավկայի նուիրեալ ու ճշմարիտ ժառանգորդ լինելու առաքելութիւնը։

Այնուհետեւ սարկաւագներին իր հայրապետական պատգամն ու օրհնութիւնը բերեց Ամենայն Հայոց Կաթողիկոսը։ Նորին Սրբութիւնը ցաւով արձանագրեց, որ պատերազմի ծանր հետեւանքներով պայմանաւորուած այս տարի Մայր Աթոռում Սուրբ Ստեփանոսի տօնն առանձնակի հանդիսաւորութեամբ չնշուեց։ Սակայն Հայոց Հայրապետը կարեւոր նկատեց հանդիպումը սարկաւագների հետ՝ մէկ անգամ եւս անդրադառնալու Հայոց Եկեղեցու առաքելութեանը, սարկաւագների ծառայութեանը Եկեղեցու անդաստանում ու հայ ժողովրդի կեանքից ներս, որպէսզի առաւել ջանասիրութեամբ շարունակեն իրենց հոգեւոր սպասաւորութիւնը հայորդիներին։

Այս առիթով Նորին Սրբութիւնն իր գնահատանքը յայտնեց սարկաւագաց դասին նուիրեալ ծառայութեան համար՝ մասնաւորաբար նշելով գնդերեց սարկաւագների՝ Հայոց բանակին մատուցած օգտաշատ ծառայութեան մասին՝ փաստելով նաեւ, թէ անձնական օրինակով ինչպիսի ոգի էին ներշնչում, արիութիւն փոխանցում մեր բանակի զինուորներին։

Ամենայն Հայոց Կաթողիկոսն իր գնահատանքն արտայայտեց նաեւ այն սարկաւագներին, որոնք քաջարի ոգով ու սիրով այդ դժուար ու ծանր օրերին յանձ առան իրենց ծառայութիւնը բերել Դադիվանքում՝ յաղթահարելով թշնամու ոտնձգութիւնները, որով կարելի դարձաւ հնամեայ վանական համալիրը պահել Արցախի թեմի վերահսկողութեան ներքոյ։

Հայոց Հայրապետը գոհունակութեամբ արձանագրեց, որ թեբ կ'որոնաւիրուսի համաւարակի եւ թեբ արցախեան պատերազմի պայմաններում եկեղեցականութիւնն իր բոլոր դասերով դրսեւորեց բարձր գիտակցութիւն ու ծառայասիրութեան ոգի՝ ամբողջական մասնակցութիւն բերելով հայրենիքի ծառայութեանը եւ շօշափելի ներդրում ունենալով տարբեր խնդիրների կարգաւորման գործում։

Անդրադառնալով ներկայիս կացութեանը եւ հայ ժողովրդի զաւակների կեանքում հոգեւոր խնամքի իրականացման կարեւորութեանը՝ Ամենայն Հայոց Կաթողիկոսն ընդգծեց, որ հոգեւորականութիւնը, այդ թւում՝ սարկաւագները, շատ անելիքներ ունեն՝ մեղմելու ցաւն ու կորուստն այն ընտանիքների եւ անհատների, որոնք առաւել մեծ չափով են կրել պատերազմի հետեւանքները եւ կարիքն ունեն զօրակցութեան։ Այս առումով Նորին Սրբութիւնը ներկայացրեց Մայր Աթոռի «Աջակցենք Արցախին» սոցիալական ծրագրի իրագործման նպատակով ստեղծուած յատուկ յանձնախմբի առաքելութիւնը՝ կարեւոր նկատելով նաեւ ծրագրում սարկաւագների ներգրաւուածութիւնը։ 

Վերջում Գարեգին Երկրորդ Ամենայն Հայոց Կաթողիկոսը յորդորեց սարկաւագներին անսակարկ նուիրումով ու նախանձախնդրութեամբ շարունակել իր ազգանուէր ու աստուածահաճոյ սպասաւորութիւնը՝ մաղթելով նրանց Աստծոյ օգնականութիւնը, զօրակցութիւնն ու օրհնութիւնը, որպէսզի կարողանան իրենց ծառայութեամբ պայծառացնել Հայոց Եկեղեցին՝ այն առաւել սիրելի դարձնելով ազգի զաւակների համար։

Քաղուած «Արեւելք» էն

29/12/2021, 07:34