Որոնել

Vatican News
Ռայի Պատրիարք եւ Միշէլ Աուն Ռայի Պատրիարք եւ Միշէլ Աուն 

Պաապտայի մէջ Ռայի Պատրիարքը հանիդպեցաւ Լիբանանի հանրապետութեան նախագահ Միշէլ Աունին հետ։

Ռայի պատրիարքը նկատել տուաւ, որ ինք պապին պիտի ներկայացնէ լիբանանեան իրականութեան մանրամասնութիւնները եւ անոր հետ պիտի քննարկէ Լիբանան այցելութեան կարելիութիւնները:

Հանրապետութեան նախագահ զօր. Միշել Աուն երէկ յետմիջօրէին նախագահական պալատին մէջ ընդունեց մարոնի համայնքի Պշարա Ռայի պատրիարքը, որուն հետ քննարկեց լիբանանեան իրադարձութիւնները:

Հանդիպումէն ետք Ռայի պատրիարքը յայտնեց, որ ինք անպայման հանրապետութեան նախագահին այցելութիւն մը կու տայ, երբ երկրէն պիտի մեկնի:

Ան աւելցուց, որ ինք պիտի ուղղուի Վատիկան` հանդիպում ունենալու համար Ֆրանչիսկոս պապին հետ եւ շնորհակալութիւն յայտնելու անոր Պէյրութի նաւահանգիստի պայթումէն ետք Լիբանանի նկատմամբ ցուցաբերուած զօրակցութեան համար:

Ռայի պատրիարքը նկատել տուաւ, որ ինք պապին պիտի ներկայացնէ լիբանանեան իրականութեան մանրամասնութիւնները եւ անոր հետ պիտի քննարկէ Լիբանան այցելութեան կարելիութիւնները:

Ռայի պատրիարքը հաստատեց, որ Պէյրութի նաւահանգիստի պայթումէն տուժած բնակիչներուն մեծամասնութիւնը քրիստոնեաներ են` աւելցնելով, որ երկրին մէջ ոչ մէկ շարժում փաստեց մեր մէկ ժողովուրդ ըլլալը: «Ողջոյնի արժանի են բոլոր կամաւորները, որոնք փութացին շրջանին օժանդակութեան: Լիբանան չէզոք երկիր է, որովհետեւ անիկա բոլոր երկիրներուն համար բաց է: Այս իրականութիւնը մեզի համար հիմնական է: Իրաւական հաշուեքննութիւնը պէտք է կատարուի կառավարութեան ընդմէջէն` սահմանադրութեան համաձայն, որովհետեւ անիկա գործադիր իշխանութեան որոշում է, որ կառավարութեան կողմէ կը տրուի», ըսաւ ան:

Ռայի պատրիարքը շեշտեց, որ փտածութեան դէմ պայքարը պէտք է շարունակուի ամբողջ Լիբանանի տարածքին, սկսեալ` Կեդրոնական դրամատունէն, հասնելով բոլոր հաստատութիւններուն եւ բնագաւառներուն:

«Իրաւական հաշուեքննութեան թղթածրարը պէտք է շարունակուի, եւ հաշուեքննութիւնը պէտք է պարփակէ պետական բոլոր հաստատութիւնները», ըսաւ ան:

Ռայի պատրիարքը ընդգծեց, որ նշանակեալ վարչապետը պէտք է կառավարութեան ամբողջական կազմ մը բերէ ու ներկայացնէ նախագահին ու զայն անոր ընկերակցութեամբ սերտէ:

«Երկիրը կը մահանայ, եւ կարելի չէ այս ձեւով կառավարութիւն կազմել: Լիբանան նոյնիսկ 24 ժամուան յապաղում չի կրնար հանդուրժել: Մենք կը պահանջենք փրկութեան աննախընթաց կառավարութիւն մը, որ ըլլայ անկուսակցական եւ ոչ թէ քաղաքական: Երկիրը սնանկացած է, որովհետեւ պետութեան ելեւմուտքի աղբիւրները անհետացած են, իսկ դատական իշխանութիւնները պէտք է շարունակեն հետաքննութիւնը», ըսաւ ան:

Նախագահ Աուն Պաապտայի մէջ ընդունեց արդարութեան նախարարի պաշտօնակատար Մարի Քլոտ Նաժըմը, որուն հետ քննարկեց լիբանանեան իրադարձութիւնները, յատկապէս իրաւական հաշուեքննութեան վերաբերող մանրամասնութիւնները:

Հանդիպումին ընթացքին նախագահ Աուն շեշտեց, որ Կեդրոնական դրամատան հաշիւներու իրաւական հաշուեքննութեան մասին խորհրդարանին յղած իր նամակը քաղաքական տարակարծութիւններէն հեռու է` ըլլան անոնք ձեւական, թէ խոր տարակարծութիւններ:

Նախագահ Աուն ընդգծեց, որ իր նպատակը ազգային հսկայ դժբախտութեան մը լուծում ապահովելն է, «որովհետեւ առանց իրաւական հաշուեքննութեան կարելի չէ համաձայնիլ Լիբանանին օժանդակել փափաքող երկիրներուն հետ, ոչ ալ կարելի է համաձայնիլ Միջազգային դրամական ֆոնտին կամ անոր նման ելեւմտական խորհուրդներու հետ», ըսաւ նախագահ Աուն:

Ան շեշտեց, որ իրաւական հաշուեքննութիւնը զուտ ազգային հարց է եւ երկրին դիմագրաւած տագնապէն դուրս գալու լաւագոյն միջոցը:

Նախագահ Աուն կոչ ուղղեց լրատուամիջոցներուն հասկնալու այս իրականութիւնը եւ անսալու իրենց ուղղուած բոլոր կոչերուն, որոնցմէ վերջինը անկախութեան պատգամին մէջ հնչած էր:

Ան հաստատեց, որ տեղեկատուութեան մարզը պէտք է պատասխանատուութեամբ վարուի այս զգայուն թղթածրարին հետ, որովհետեւ այդ թղթածրարը Լիբանանի գերագոյն շահերուն կը վերաբերի:

Քաղուած «Ազդակ»էն։

26/11/2020, 08:32