Ուքրանիոյ Պերտեանսք քաղաքին մէջ հայկական խաչքար մը օծուեցաւ
ՔԻԵՒ.- Արեւելեան Ուքրանիոյ Պերտեանսք քաղաքին մէջ տեղի ունեցաւ Ազմոլ շրջանին մէջ տեղադրուած հայկական խաչքարին օծման արարողութիւն, կը հաղորդէ AnalitikaUA.net-ը, աւելցնելով. «Ուքրանիոյ Հայոց թեմի առաջնորդ Մարկոս եպս․ Յովհաննիսեանի գլխաւորութեամբ օծուած խաչքարը դարձած է ուքրանացի եւ հայ ժողովուրդներու անմեղ զոհերու յիշատակի խորհրդանիշը»:
Ըստ Ուքրանիոյ հայերու միութեան գործադիր տնօրէն Յովակիմ Յարութիւնեանի՝ յուշարձանին տեղադրումը նախաձեռնած է Պերտեանսքի հայերու միութեան նախագահ Յովհաննէս Աւդալեան:
«Վերջին քանի մը տարիներուն ընթացքին Ուքրանիոյ հայերու միութիւնը կազմակերպած է Հայաստանէն բերուած առաւել քան 25 խաչքարերու տեղադրումը. անոնցմէ մէկն ալ այժմ Պերդեանսքի մէջ է», յայտնեց Յովակիմ Յարութիւնեան:
Աւդալեան իր կարգին ընդգծեց, որ խաչքարին տեղադրումը նախատեսուած էր այս տարուան գարնան, սակայն համաճարակին պատճառով յետաձգուեցաւ:
Քաղուած «Ասպարէզ» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
