Որոնել

Vatican News
ՄԱԿ-ի քարտուղար ՄԱԿ-ի քարտուղար  (AFP or licensors)

«Համաճարակը Ափրիկէի մէջ տակաւին սկզբնական Փուլի մէջ Է եւ կրնայ արագօրէն տարածուիլ ու քայքայիչ հետեւանքներ ունենալ» կ՛ըսէ Կութիերես

Ափրիկէի հետ համաշխարհային համերաշխութիւնը թէ՛ այս իրավիճակէն դուրս գալու, թէ՛ ալ յաջող վերականգնման համար մեր առաջնային քայլերէն է», ընդգծած է Կութիերես:

ՄԱԿ-ի ընդհանուր քարտուղար Անթոնիօ Կութիերես միջազգային ընտանիքին կոչ ուղղած է` «Քորոնա» ժահրի համաճարակին հետեւանքներու դէմ պայքարին մէջ օգնելու ափրիկեան երկիրներուն: Այս մասին կը հաղորդէ «ՌԻԱ Նովոսթի» լրատու գործակալութիւնը:

Ունկնդրէ լուրը

«Մենք կոչ կ՛ուղղենք` միջազգային գործողութիւններ կատարելու Ափրիկէի առողջապահական համակարգերու ամրապնդման, սնունդի մատակարարման, ելեւմտական ճգնաժամի կանխարգիլման, կրթութեան աջակցելու, աշխատատեղերու պահպանման, ինչպէս նաեւ եկամուտներու կորուստի հետեւանքներու մեղմացման ուղղութեամբ», նշած է Կութիերես:

Ընդհանուր քարտուղարը նաեւ խօսած է արձագանգման քայլերու համաշխարհային թղթածրարի եւ ափրիկեան երկիրներուն «կարելի որեւէ պատուաստանիւթերու եւ բուժման մեթոտներու արագ եւ մատչելի հասանելիութեան» ապահովման անհրաժեշտութեան մասին:

«Ափրիկէի մէջ համաճարակը տակաւին կը գտնուի սկզբնական փուլին մէջ եւ կրնայ արագօրէն տարածուիլ եւ քայքայիչ հետեւանքներ ունենալ: Ափրիկէի հետ համաշխարհային համերաշխութիւնը թէ՛ այս իրավիճակէն դուրս գալու, թէ՛ ալ յաջող վերականգնման համար մեր առաջնային քայլերէն է», ընդգծած է Կութիերես:

Առողջապահութեան համաշխարհային կազմակերպութեան շրջանային ներկայացուցչութեան վերջին տուեալներուն համաձայն, Ափրիկէի մէջ «Քորոնա» ժահրով վարակուածներուն թիւը շրջանցած է 86.700-ը, իսկ մահացածներուն թիւը աւելի քան 2700 է:

Քաղուած Ազդակէն

22/05/2020, 08:57