Որոնել

Vatican News
Հիւսիսային Արիզոնա Համալսարանը Ֆլագսթաֆֆում Հիւսիսային Արիզոնա Համալսարանը Ֆլագսթաֆֆում   Պատմութիւնը

Կաթողիկէ ուսանողները Սուրբ Ջոն Անրի Նիւմանի հետքերով

Կաթողիկէ դաւանանք ընդունած եւ բոլորովին վերջերս սրբադասուած Կարդինալ (Ծիրանաւոր) Ջոն Անրի Նիւմանի հոգեւոր ժառանգութիւնը երիտասարդ ամերիկացիների ուսանողական կեանքում: Վկայութիւններ Միացեալ Նահանգների սրտում՝ Նոր Դարաշրջանի ազդեցութեան եւ իրական արժէքներից հեռացման վտանգի ներքոյ:

Անթօնելլայ Փալերմոյ – Վատիկան Նիուզ

Մենք գտնւում ենք Միացեալ Նահանգների հարաւ-արեւմուտքում՝ Արիզոնա նահանգի Ֆլագսթաֆֆ քաղաքում: Քոլորադոն եզերող այս քաղաքն ունի մօտաւորապէս 150 000 բնակիչ: Ֆլագսթաֆֆը տեղակայուած է Միացեալ Նահանգների գլխաւոր Մայրուղի 66-ի վրայ, որը յայտնի է բոլորին եւ, որով նախընտրում են ճանապարհորդել հազարաւոր զբօսաշրջիկներ, ովքեր մասնաւորապէս հրապուրուած են մօտերքում գտնուող Մեծ Կիրճի զբօսայգի այցելութեամբ: Անծայրածիր տարածութիւն, հանդիպումների համար սակաւաթիւ վայրեր, ինչպէս նաեւ տասնեակ փակ կամ լքուած խանութներ՝ տարուայ ոչ զբօսաշրջային եղանակի պատճառով: Կայարանի քառուղիներում կարելի է հանդիպել Ամիշ համայնքից մի քանի խմբերի: Կիրակի է: Գրեթէ անիրական մի բնապատկերի կիզակէտում փնտռում ենք որեւէ ծխական եկեղեցի, որպէսզի մասնակցենք պատարագի: Բջջային հեռախօսի քարտէզը ցոյց է տալիս Հիւսիսային Արիզոնա Համալսարանը: Փոքր-ինչ վարանելուց յետոյ քայլերն ուղղում ենք դէպի համալսարանական համալիր տանող կիսաանապատային արահետ: «Արդեօ՞ք վստահ ենք»: Իսկ մինչ այդ, աղօտ յիշողութիւններ են առաջանում այն ժամանակաշրջանից, երբ այցելում էի Եւրոպայի ամենամեծ՝ Հռոմի Sapienza համալսարանի մատուռ:
Տղաներն ու աղջիկները ջերմ ընդունելութիւն են ցուցաբերում մեզ: Նրանք լարում են երաժշտական գործիքները, որոնք պատարագի ընթացքում նուագակցելու են շարականներին: Տարածքը շատ փոքր է, սակայն բաւական՝ խմբերին միացող ընտանիքներին եւ տարեց մարդկանց իր հարկի տակ ընդունելու: Կարելի է նկատել, որ այստեղ իւրաքանչիւրն իր ուրոյն դերն ունի պատարագի նախապատրաստական աշխատանքներում, ինչպէս նաեւ ընդհանուր աշխուժութեան եւ ընդունելութեան կազմակերպման գործում: Կամաց-կամաց յառաջանում ենք դէպի Համալսարանի Նիւման Կենդրոն:

Գաբրիէլ Մեթիւս, ուսանող
Գաբրիէլ Մեթիւս, ուսանող

Մեծ համայնք

Գաբրիէլ Մեթիւսը Սպորտային գիտութեան բաժնի ուսանող է: Նրա համար Նիւման Կենդրոնն «իսկական օջախ է՝ հեռու հայրենի տնից», կատարեալ մի վայր, ուր կարող ես հանդիպել ընկերների: Նա հիացած է «Նիւմանի Երեկոներով», ինչը «ճշմարտութեան որոնման» շատ լաւ հնարաւորութիւն է: Այսպիսի երեկոներ տեղի են ունենում շաբաթական մէկ անգամ, որին կանոնաւոր կերպով մասնակցում են հարիւրաւոր երիտասարդներ:

Ժազզի Զալեսկի. Բիզնէս Շուկայագիտութեան ճիւղի ուսանողուհի
Ժազզի Զալեսկի. Բիզնէս Շուկայագիտութեան ճիւղի ուսանողուհի

Ժազզի Զալեսկին համալսարանում ուսումնասիրում է Բիզնէս Շուկայագիտութիւն եւ սպաներէն լեզու: Նա չափազանց ուրախ է, որ այստեղ կարող է ընդլայնել մարդկանց հետ արդիւնաւէտ փոխյարաբերութիւնները, որոնք էլ աւելի ամրապնդեցին նրա հաւատքը: Ամուր, առողջ եւ երջանիկ սոցիալական համակարգ ունենալու անհրաժեշտութիւնն ակնյայտ է: Ինչպէս վկայում է Մարիա Յանեզը. «Մեզանից իւրաքանչիւրը մեծ ցանկութիւն ունի նպաստել համայնքի իրական զգացողութիւն ստեղծելուն»:

Մարիա Յանեզ, ուսանողուհի
Մարիա Յանեզ, ուսանողուհի

Կարդինալ Նիւմանի ժառանգութիւնը Ամերիկայի համալսարանական կեանքում

Շատ արժէքաւոր է Կարդինալ Նիւմանի ներդրումը համալսարանի մշակութային կեանքում: Յիշեցնենք, որ նա եղել է Իրլանտայի Կաթողիկէ Համալսարանի (ներկայիս Տուպլինի Համալսարանական Վարժարան) ռեկտոր: Փենսիլուանիայի Համալսարանի ներսում ստեղծուեցին առաջին Նիւման Կենդրոնները, որոնք 20-րդ դարի սկզբին ծնունդ տուեցին մի միաւորման, որն աւելի ուշ դարձաւ Նիւման Կենդրոնների Ազգային Դաշնութիւն (National Newman Club Federation): Այժմ, միայն Միացեալ Նահանգներում գոյութիւն ունեն 1486 Նիւման Կենդրոններ: Սա կարծես իսկական արիւնատար համակարգ լինի, որի աւիշը ներարկւում է բոլորովին վերջերս սրբադասուած անգլիացի կարդինալի հանրածանօթ կերպարի միջոցով, ինչի շնորհիւ, նա գուցէ շատ աւելի մեծ ճանաչում ունի Ամերիկայում, քան սեփական հայրենիքում: Համակարգ, որին յաջողւում է իր ներկայութիւնն ապահովել նաեւ ոչ կաթողիկէ միջավայրերում եւ գործել որպէս կատալիզատոր այնպիսի մի իրականութեան մէջ, որը բարոյալքման, մերժման եւ մեկուսացման մեծ վտանգի առջեւ է կանգնած: «Շատ յաճախ, ուսանողները միայնակ եւ մեկուսացած են զգում: Սա մի վայր է, որտեղ երիտասարդները կարող են իրենց ապահով զգալ եւ սովորել կեանքում առաջ շարժուել՝ լինելով բաց, լի եռանդով, ստեղծագործ եւ, որ ամենակարեւորն է՝ երկխօսութեան միջոցով», - մեկնաբանում է Հոգեւոր Հովիւ Հայր Մեթթ Լոուրին:

Հ. Մեթթ Լոուրի, հոգեւոր հովիւ
Հ. Մեթթ Լոուրի, հոգեւոր հովիւ

Երիտասարդներին նուիրուած Սիւնհոդոսի արդիւնքները: Աստծուն որոնելիս 

Հայր Մեթթ Լոուրին ողջունում է երիտասարդների կարծիքը լսելու Սրբազան Քահանայապետի առանձնայատուկ շնորհը: Նա նկատում է, որ Երիտասարդներին նուիրուած եպիսկոպոսական Սիւնհոդոսի այս փորձառութիւնը մեծ խրախոյս եղաւ Եկեղեցու համար: Սա մարդկանց լսելու նոյն ոճն է, որն ընդունուած է Նիւման Կենդրոնում. «Այստեղ մենք սիրում ենք տարբեր հարցադրումներ անել եւ հետամուտ լինել ճշմարտութեան որոնման հարցում: Նիւմանն ինքնատիպ միջնորդ է մեզ համար: Մեր ցանկութիւնն է այստեղ եւ միւս ուսումնական հաստատութիւններում մեր ներկայութիւնն ապահովել, որպէսզի ուսանողներն իմանան, որ Յիսուսն ամէնուր ուղեկցում է նրանց»: Հայր Լոուրին նաեւ պատմում է ոչ կաթողիկէ պատկանելիութիւն ունեցող մի ուսանողի անցած ճանապարհի մասին, ով Կենդրոնում կազմակերպուած տօնախմբութիւնից յետոյ ցանկութիւն յայտնեց մասնակցել պատարագի: Ժամանակի ընթացքում նա սկսեց աւելի խորը ուսումնասիրել Աստուծոյ Խօսքը, մկրտուեց եւ վերստին ընդունուեց հաւատացեալների համայնք
 

FOCUS-ի միսիոնարները

FOCUS-ը մեկնաբանւում է որպէս «Կաթողիկէ Ուսանողական Միութիւն» (‘Catholic Student Society’): FOCUS-ի միսիոնարներն (կամ, ինչպէս Նիւմանի լեզուով են ասում՝ Focus Missionary-ն) այն մարդիկ են, ովքեր օգնում են համալսարանական այս համալիրում ուսանող եւ ապրող ուսանողներին համակուել Քրիստոսով: Էշլի Քիլզերը FOCUS-ի միսիոնարներից մէկն է: Նա պատմում է, թէ ինչպէս է իր խորհուրդներով օգնում մարդկանց «համակողմանի զարգացում ապրել, ամէն ջանք ներդնել ինչպէս սեփական անձի, այնպէս էլ հոգեւոր կեանքի աճի եւ Աստուծոյ հետ իրենց փոխյարաբերութիւնների պահպանման համար: Նրանք ներդրում են անում արդէն իսկ գոյութիւն ունեցող փոխյարաբերութիւններում, իսկ մենք միայն աջակցում ենք ընտրութեան հարցում», - եւ այս ամէնը՝ շնորհիւ իսկական մարդկային փոխյարաբերութիւնների, որոնք ճանապարհ են հարթում լիակատար երջանկութեան համար:

 

Ֆեյթ Սթենլ. FOCUS-ի միսիոնար
Ֆեյթ Սթենլ. FOCUS-ի միսիոնար

Պահպանել «կեանքի մշակոյթը»
Միքայ Միհանը ծագումով Ֆինիքսից է, համագործակցում է Կենդրոնի հետ եւ մասնակցում այստեղ կազմակերպուող տարբեր ձեռնարկներին: «Երբեմն դժուար է շարունակել ուսումը եւ հետեւել իւրաքանչիւր դասընթացքի համար պահանջուող կրթական ողջ գործընթացին: Այնուամենայնիւ, ես գտնում եմ ժամանակ՝ Յիսուսին նուիրելու»: Նա Նիւման Կենդրոնը ներկայացնում է որպէս Ֆլագսթաֆֆում գործող իսկական կաթողիկէ կենդրոն, որն ի վիճակի է կանգնեցնել այն մարդկանց, ովքեր միայն մահուան մշակոյթին են ծանօթ: «Կարծում եմ, որ մեր առաքելութիւնն է պահպանել եւ տարածել կեանքի մշակոյթը, որի մասին Աւետարանում քարոզում էր Քրիստոսը»:

Միքայ Միհան, ուսանող
Միքայ Միհան, ուսանող

Թարգմանեց՝ Հրանուշ Սարգսեանը



 

11/03/2020, 08:27