Որոնել

Vatican News
Երեւան մայրաքաղաք Երեւան մայրաքաղաք 

Սփիւռքի մասնագէտներու համար կը մեկնարկէ «Ի գործ» ծրագիրը:

Ծրագրին դիմելու համար անհրաժեշտ է ունենալ մագիստրոսի կամ աւելի բարձր գիտական աստիճան:

ՀՀ սփիւռքի գործերու գլխաւոր յանձնակատարի գրասենեակը կը մեկնարկէ «Իգործ» բացառիկ ծրագիրը եւ սփիւռքահայ մասնագէտներուն կը հրաւիրէ աշխատելու Հայաստանի պետական մարմիններու մէջ: Ծրագիրը նպատակ ունի նպաստելու պետութեան կառավարման գործին սփիւռքի զարգացած ներուժի ներգրաւման եւ մասնագիտական հայրենադարձութեան գործընթացի աշխուժացման, կը հաղորդէ “Արմռատիօ”-ն:

Ըստ պետական օղակներու կողմէ ներկայացուած մասնագիտական կարիքներուն` ծրագրի ծիրէն ներս սփիւռքահայ մասնագէտները գործունէութիւն պիտի ծաւալեն Հայաստանի Հանրապետութեան գրեթէ բոլոր նախարարութիւններու եւ կառավարութեան առնթեր մարմիններու մէջ` ներդնելով սեփական փորձն ու գիտելիքները համապատասխան ոլորտներու բարելաւման եւ զարգացման, քաղաքականութիւններու եւ ծրագիրներու մշակման գործին:

Ծրագրին դիմելու համար անհրաժեշտ է ունենալ մագիստրոսի կամ աւելի բարձր գիտական աստիճան: Սփիւռքի գործերու գլխաւոր յանձնակատարի գրասենեակը մասնակիցներուն պիտի տրամադրէ օդանաւի տոմս եւ 336 հազար դրամ գումար կեցութեան ծախսերը հոգալու համար: Ծրագիրը պիտի տեւէ մէկ տարի եւ պիտի մեկնարկէ Յուլիս 1-էն։

Մասնակցելու համար անհրաժեշտ է լրացնել յայտադիմումը մինչեւ Ապրիլ 15-ը հետեւեալ յղումով` http://diaspora.gov.am/hy/pages/97/igorts:

Ծրագրի մանրամասնութիւնները ու կարեւորութիւնը այսօր ներկայացուցած են ՀՀ վարչապետ Նիկոլ Փաշինեանը եւ Գլխաւոր յանձնակատար Զարեհ Սինանեանը:

Քաղուած Եռագոյնէն

07/03/2020, 08:33