Որոնել

Vatican News
«Գալուստ Կիւլպէնկեան» «Գալուստ Կիւլպէնկեան» 

«Գալուստ Կիւլպէնկեան» հիմնարկութեան հայկական բաժանմունքը 170 Հազար ամերիկեան տոլար կը յատկացնէ Լիբանանի հայկական դպրոցներուն:

Գալուստ Կիւլպէնկեան» Հիմնարկութեան Հայկական Բաժանմունքը մօտէն հետեւեցաւ եւ կը շարունակէ հետեւիլ Լիբանանի քաղաքական եւ տնտեսական դաշտի զարգացումներուն, ք

«Գալուստ Կիւլպէնկեան» Հիմնարկութեան Հայկական Բաժանմունքը170 հազար ամերիկեան տոլարի գումար մը կը յատկացնէ Լիբանանի մէջ գործող 18 դպրոցներուն: Այս նուիրատւութեան ծիրէն ներս, նպաստ մը կը տրամադրուի նաեւ յատուկ կարգավիճակ ունեցող երեխաներ հոգացող Թռչնոց Բոյն հաստատութեան:

Անցնող քանի մը ամիսներուն ընթացքին՝ Լիբանանը կրկին անգամ յայտնուեցաւ քաղաքական, ընկերային եւ տնտեսական ծանր վիճակի մէջ: «Գալուստ Կիւլպէնկեան» Հիմնարկութեան Հայկական Բաժանմունքը մօտէն հետեւեցաւ եւ կը շարունակէ հետեւիլ Լիբանանի քաղաքական եւ տնտեսական դաշտի զարգացումներուն, քաջ գիտակցելով, որ երկրին մէջ տեղի ունեցող բոլոր վերիվայրումները իրենց ուղղակի անդրադարձը ունին նաեւ հայ համայնքին եւ դպրոցին վրայ:

2019-ի կիսուն, Հիմնարկութեան Հայկական Բաժանմունքը հրատարակեց Լիբանանահայ գաղութի կրթական կեանքին առնչուող իր ռազմավարութիւնը (https://gulbenkian.pt/armenian-communities/2019/08/09/new-strategy-lebanon/): Դպրոցական վերամուտին յաջորդելիք ծրագիրներուն մեկնարկը քանի մը ամիսով յետաձգուեցաւ՝ Լիբանանի մէջ տիրող տագնապին պատճառաւ:

Ուղղակիօրէն դպրոցներուն փոխանցուած գումարները սահմանուեցան ըստ իւրաքանչիւր հաստատութեան աշակերտութեան եւ ուսուցչական կազմի թիւերուն, ինչպէս նաեւ՝ Հիմնարկութեան Հայկական Բաժանմունքի Լիբանանի ներկայացուցիչին եւ դպրոցներու ղեկավարներուն միջեւ տեղի ունեցած հանդիպումներուն ընթացքին ընդգծուած հարցերուն:

Հայկական Բաժանմունքի տնօրէն՝  Դոկտ. Ռազմիկ Փանոսեան այս առիթով ըսաւ, որ «դպրոցները համայնքին ապագան են: Կրթական ծրագիրներու կողքին անոնք ունին կենցաղային եւ առօրեայ հսկայական ծախսեր, որոնք այս դժուար օրերուն առաջնային կը դառնան: Ներկայ յատկացումները չեն փոխարիներ մեր ռազմավարութեան ծրագիրները, այլ՝ համեստ եւ անյետաձգելի նեցուկ մը կը հանդիսանան լիբանանահայ դպրոցին, հաստատելով «Գալուստ Կիւլպէնկեան» Հիմնարկութեան համագործակցութիւնը կրթական հաստատութիւններուն հետ»:

Դոկտ. Փանոսեան Փետրուար ամսուն պիտի այցելէ Լիբանան եւ հանդիպումներ պիտի ունենայ կրթական ոլորտի ներկայացուցիչներուն հետ՝ արժեւորելու համար ռազմավարութեան մէջ տեղ գտած ծրագիրներուն ընթացքը եւ ուրուագծելու Հիմնարկութեան ապագայ քայլերը Լիբանանի մէջ:

Քաղուած Եռագոյնէն

 

17/01/2020, 09:02