Որոնել

Vatican News
Լիբանանի մէջ ցուցարարներու եւ ոստիկաններու  միջեւ բախումներ Լիբանանի մէջ ցուցարարներու եւ ոստիկաններու միջեւ բախումներ  (AFP or licensors)

Պէյրութը կը վերածուի ցուցարարներուն եւ ապահովութեան ուժերուն միջեւ մարտադաշտի:

Կառավարութեան Կազմութիւնը Կ՛ուշանայ:

Շաբաթ յետմիջօրէին Նըժմէի հրապարակ տանող Կեդրոնական Պէյրութի փողոցը վերածուեցաւ մարտադաշտի` ցուցարարներուն եւ ապահովութեան ուժերուն միջեւ:

Շաբաթ կէսօրէ ետք ժամը 3:00-ին Պարպիրէն, Տորայէն եւ Սեսին հրապարակէն մեկնարկած ժողովրդային խաղաղ քայլարշաւները, որոնց մասնակից քաղաքացիները տարբեր ուղղութիւններով տողանցեցին դէպի խորհրդարան, մերժեցին տիրող տնտեսական պայմանները, դրամատնային համակարգը, նոր կառավարութեան կազմութիւնը եւ իրենց նկատմամբ ներկայ իշխանութիւններուն ցուցաբերած անտարբերութիւնը:

Այս ցոյցին միացան նաեւ Թրիփոլիէն, Աքքարէն եւ կեդրոնական Պեքաայէն քանի մը տասնեակ փոխադրակառքերով ժամանած քաղաքացիներ:

Երբ ցուցարարները հասան խորհրդարանի մուտքին, ցոյցին քաղաքակիրթ եւ խաղաղ բնոյթը վերացաւ եւ վերածուեցաւ բախումներու կեդրոնի, որ ընդարձակուեցաւ մինչեւ Սայֆի եւ Մոհամետ Ամին մզկիթ` այդ շրջանը վերածելով իսկական մարտադաշտի մը:

Կէսօրէ ետք շուրջ ժամը 4:00-էն մինչեւ կէս գիշեր իրենց դէմքերը փակած ցուցարարները Ներքին ապահովութեան ուժերու վայրագութիւնները զսպող ջոկատը քարկոծեցին:

Ապահովութեան ուժերը թիրախ դարձան նաեւ պայթուցիկով յարձակումի, շրջանին ազդալոյսերու սիւներով, պոկուած ծառերով եւ այլ միջոցներով հարուածներու:

Անոնք իրենց կարգին ցուցարարները փորձեցին ցրուել ջրցան մեքենաներով ջուր բանալով, ինչպէս նաեւ արցունքաբեր կազեր արձակելով անոնց վրայ:

Ուշ գիշերին ապահովութեան ուժերը նաեւ ձգախէժէ փամփուշտներ արձակեցին կարգ մը ցուցարարներու վրայ, ինչպէս նաեւ հրկիզուեցան ցուցարարներուն լարած վրանները, որոնց հրկիզման յանցանքով ամբաստանուեցաւ խորհրդարանի ոստիկանութիւնը, որ իր կարգին հերքեց այդ լուրը:

Այս բախումները աւարտեցան, երբ լիբանանեան բանակի անկարգելաւորներու ջոկատը միջամտեց եւ իր հակակշիռին տակ առաւ կացութիւնը, ինչպէս նաեւ կատարուեցան մեծ թիւով ձերբակալութիւններ:

Բանակին միջամտութիւնը կատարուեցաւ, երբ հանրապետութեան նախագահ զօր. Միշել Աուն հեռաձայնային հաղորդակցութիւններ ունեցաւ պաշտպանութեան նախարարի պաշտօնակատար Էլիաս Պու Սաապի, ներքին գործոց նախարարի պաշտօնակատար Ռայա Հասանի, լիբանանեան բանակի հրամանատար զօր. Ժոզեֆ Աունի եւ Ներքին ապահովութեան ուժերու ընդհանուր տնօրէն հազարապետ-զօրավար Իմատ Օսմանի հետ, եւ կոչ ուղղեց անոնց պաշտպանելու խաղաղ ցուցարարներուն անվտանգութիւնը, պետական եւ սեփական կառոյցներուն ապահովութիւնը եւ հանդարտութիւնը վերահաստատելու Պէյրութի փողոցներուն մէջ:

Նշենք, որ շաբաթ գիշեր Պէյրութի մէջ ցուցարարներուն զօրակցելու համար, այլ շրջաններու մէջ ցուցարարներ փակեցին Քորնիշ Մազրաան, Մասնաա-Ռաշայա ճամբան, Սայտայի Էլիա հրապարակն ու Սայտայի ծովեզերեայ ճամբան, ինչպէս նաեւ Մընիէի եւ Փալմայի մայրուղիները:

Մարտերուն պատճառով ապահովութեան ուժերուն շարքերուն մէջ արձանագրուեցան 142 վիրաւորներ, որոնցմէ` 7 սպաներ, ինչպէս նաեւ 3 ծանր վիրաւորներ:

Քաղաքացիներուն շարքերուն մէջ արձանագրուեցան 169 վիրաւորներ, որոնք փոխադրուեցան շրջակայ հիւանդանոցները:

Երէկ առաւօտեան զօր. Աուն այցելեց Հըլու ոստիկանատուն, ուր դիմաւորուեցաւ հազարապետ-զօրավար Իմատ Օսմանի եւ Պէյրութի ոստիկանապետ գնդապետ Մոհամետ Այուպիի կողմէ:

Զօր. Աուն ստուգեց ցոյցերուն ընթացքին ապահովութեան ուժերուն կողմէ գետնի վրայ  որդեգրուած քայլերն ու արձակուած հրահանգները:

Զօր. Աուն դրուատեց ապահովութեան ուժերուն աշխատանքը եւ գնահատեց անոնց արհեստավարժ գործելաձեւը` երկրին դիմագրաւած այս զգայուն փուլին ընթացքին:

Ան գնահատեց նաեւ ապահովութեան ուժերուն զոհողութիւնները` պաշտպանելու համար կայունութիւնն ու քաղաքացիներուն անվտանգութիւնը` ընդգծելով բանակին եւ ապահովութեան ուժերուն միջեւ գործակցութիւնը` ի խնդիր կարգ ու կանոնի պահպանումին:

Քաղուած Ազդակէն

20/01/2020, 08:45