Որոնել

Vatican News
Անթիլիասի մայրավանքը Անթիլիասի մայրավանքը 

Անթիլիասի մէջ սկիզբ առաւ Հայ մամուլի համահայկական համագումարը

Համագումարին կը մասնակցին շուրջ հարիւր հայկական թերթերու խմբագրապետներ, խմբագիրներ, լրագրողներ եւ աշխատակիցներ:

Երեքշաբթի, 2 յուլիսին, Անթիլիասի մէջ  Տէրունական աղօթքով՝ սկիզբ առաւ Հայ Մամուլին նուիրուած Համահայկական Համագումարը։ Այնուհետեւ հնչեցին Հայաստանի, Արցախի եւ Կիլիկիոյ քայլերգերը, որմէ ետք՝ Ն.Ս.Օ.Տ.Տ. Արամ Ա. կաթողիկոս իր պատգամը փոխանցեց համագումարի մասնակիցներուն։ Կիլիկիոյ կաթողիկոսը շնորհակալութիւն յայտնեց Հայաստանէն, Արցախէն եւ Սփիւռքի զանազան շրջաններէ Անթիլիաս ժամանած հիւրերուն, որոնք միասնաբար պիտի քննեն ու արժեւորեն մամուլին առանցքային տեղը հայ կեանքէն ներս, եւ՝ համագործակցութեան նոր ուղիներ ճշդելու։ «Հայ մամուլի ծառայութեան լծուած մշակներու համախումբ ու միատեղ ներկայութիւնը պերճախօս վկայութիւն մըն է մամուլի ներկայացուցած համահայկական կարեւորութեան եւ անոր վիճակուած ճշդորոշիչ դերին»,- ընդգծեց Վեհափառ հայրապետը։

Իբրեմ պատասխան իր իսկ տուած շարք մը հարցերու, իր խօսքի աւարտին՝ Արամ Ա. կաթողիկոս շեշտեց, թէ ներկայ համագումարը առիթ է իրապաշտ մօտեցումով անդրադառնալու այժմէական ու հրատապ հարցերուն եւ մարտահրաւէրներուն։ «Վերջապէս, համագումարէն անդին հրամայական կը նկատենք՝ Հայաստան, Արցախ եւ Սփիւռք համատեղ գործակցութեամբ շարունակելու հայ մամուլի համահայկական առաքելութեան վերարժեւորման ու վերահզօրացման նպաստող աշխատանքները»,- իր խօսքը եզրափակեց Կիլիկիոյ կաթողիկոսը։

Վեհափառ հայրապետի պատգամին պիտի յաջորդէ ՀՀ վարչապետ Նիկոլ Փաշինեանի ողջոյնի խօսքը, որմէ ետք խօսք պիտի առնեն Լիբանանի մէջ ՀՀ դեսպան Վահագն Աթաբեկեան եւ Համագումարի պատուոյ հիւր՝ Տիկին Աննա Յակոբեանին։

Յիշեցնենք, որ Հայ Մամուլին նուիրուած համահայկական համագումարը պիտի շարունակուի մինչեւ Հինգշաբթի 4 Յուլիս։

02/07/2019, 10:15