Cerca

Vatican News
Բացուած է Արեւմտահայերէն Ուիքիփետիան: Բացուած է Արեւմտահայերէն Ուիքիփետիան: 

Բացուած է Արեւմտահայերէն Ուիքիփետիան:

Ապրիլ 1-ին Արեւմտահայերէն Ուիքիփետիան վերջապէս կրցաւ ստանալ իր առանձին հարթակը Ուիքիփետիաներու ցանկին մէջ

Երկար սպասումէ ետք, սոյն թուականի ապրիլ 1-ին Արեւմտահայերէն Ուիքիփետիան վերջապէս կրցաւ ստանալ իր առանձին հարթակը Ուիքիփետիաներու ցանկին մէջ` hyw.wikipedia.org յղմամբ:

2014 թուականէն ի վեր Արեւմտահայերէն Ուիքիփետիա ստեղծելու գաղափարին շուրջ  համախմբուած են հարիւր յիսունէ աւելի կամաւոր խմբագիրներ, որոնք պարբերաբար մասնակցած են վերապատրաստման դասընթացներուն: Այսօր մենք արդէն իսկ ունինք 7500-է աւելի արեւմտահայերէն յօդուածներ, որոնք տեղակայուած են Արեւելահայերէն Ուիքիփետիային մէջ  եւ շուտով կը տեղափոխուին Արեւմտահայերէն Ուիքիփետիա: Մեր մարտահրաւէրը պէտք է ըլլայ այդ թիւն օրը-օրին աւելցնելը եւ ատոնց որակը բարձրացնելը:

Արեւմտահայերէն Ուիքիփետիային` որպէս առանձին հանրագիտարան դառնալու ջանքերուն  նպաստած են «Ուիքիմետիա Հայաստան» գիտակրթական հասարակական կազմակերպութիւնը եւ «Գալուստ Կիւլպէնկեան» հիմնարկութիւնը, որոնք անցնող տարիներուն աջակցած են Արեւմտահայերէն Ուիքիփետիայի ստեղծման եւ հովանաւորած նախագիծի ձեռնարկները:

Արեւմտահայերէն Ուիքիփետիա ազատ հանրագիտարանի նպատակը եղած է եւ կը մնայ բազմատեսակ որակեալ յօդուածներու ստեղծումը եւ անով իսկ արեւմտահայերէն բովանդակութեան շրջանառութեան մէջ կարեւոր ներդրում ունենալը:

«Այս ուրախ օրուան առիթով մեծապէս շնորհակալութիւն կը յայտնենք Արեւմտահայերէն Ուիքիփետիայի բոլոր կամաւորներուն եւ խմբագիրներուն: Շնորհակալութիւն բոլոր անոնց, որոնք սատարեցին եւ կը շարունակեն սատարել այս աշխատանքի իրականացման»,— ըսաւ Արեւմտահայերէն Ուիքիփետիա նախագիծի համակարգող Ազնիւ Ստեփանեան եւ աւելցուց, որ  Արեւմտահայերէն Ուիքիփետիան կրնայ կարեւոր խթան հանդիսանալ արեւմտահայերէնի գործածութեան համար:

«Կը շնորհաւորենք Արեւմտահայերէն Ուիքիփետիայի համայնքն ու արեւմտահայերէն խօսող մեր հայրենակիցները,— ըսաւ Ուիքիմետիա Հայաստանի նախագահ Սուսաննա Մկրտչեան,— Սա արեւմտահայերէնին վերածնունդ տալու նշանակալի քայլ է, հզօր հնարաւորութիւն է  արեւմտահայերէնը պահպանելու  եւ զարգացնելու որպէս գիտելիք ստեղծելու եւ ստանալու լեզու»:

«Ուիքիփետիան կարեւոր հարթակ է, ուր արեւմտահայերէնը կարելի է գործածել զանազան ձեւերով` կարդալով, խնբագրելով, բարելաւելով եւ ստեղծելով արեւմտահայերէն յօդուածներ, — ըսաւ «Գալուստ Կիւլպէնկեան» հիմնարկութեան հայկական բաժանմունքի տնօրէն դոկտոր Ռազմիկ Փանոսեան,— Ուրախ ենք, որ մեր աջակցութիւնը արդիւնաւէտ հիմքերու վրայ է: Յոյս ունինք, որ լեզուին տիրապետող բոլոր անհատներն այս առիթը կ’օգտագործեն համացանցի վրայ արեւմտահայերէն բովանդակութիւնը զարգացնելու համար»:

Նշենք, որ Արեւմտահայերէն Ուիքիփետիան առանձին ISO 639-3 լեզուական թուանշանը (code) ստացած է 2018 թուականի յունուար 30-ին SIL International-ի կողմէ․ լեզուական թուանշանի առկայութիւնը հնարաւորութիւն տուաւ ստեղծելու Արեւմտահայերէն Ուիքիփետիան, ինչպէս նաեւ այն կրնայ խթանել համացանցի վրայ արեւմտահայերէնով տարբեր ծրագիրներ (սրբագրիչ, փոխադրիչ, թարգմանիչ) մշակելու աշխատանքները:

Արեւմտահայերէն Ուիքիփետիան բաց է բոլորիս համար: Ուիքիփետիայի խմբագրման հնարաւորութիւններուն ծանօթ բոլոր անձիք կրնան իրենց մասնակցութիւնը բերել հանրագիտարանի զարգացման գործին:

 

06/04/2019, 09:06