Cerca

Vatican News
Հայ Կաթողիկէ Մեսրոպեան բարձրագոյն վարժարանի աշակերտները կատարեցին իրենց մկրտութեան խորհուրդի վերահաստատման խոստումը: Հայ Կաթողիկէ Մեսրոպեան բարձրագոյն վարժարանի աշակերտները կատարեցին իրենց մկրտութեան խորհուրդի վերահաստատման խոստումը: 

Հայ Կաթողիկէ Մեսրոպեան բարձրագոյն վարժարանի աշակերտները կատարեցին իրենց մկրտութեան խորհուրդի վերահաստատման խոստումը:

Արարողութիւնը տեղի ունեցաւ Սուրբ Պատարագի ընթացքին, զոր մատոյց Մեսրոպեանի հոգեւոր վարիչ Տէր Ռաֆֆի քհն. Յովհաննէսեան, Սուրբ Փրկիչ եկեղեցւոյ մէջ:

6 դեկտեմբերի 2018-ին, եւ յաջորդաբար երկրորդ տարին ըլլալով, Հայ կաթողիկէ Մեսրոպեան բարձրագոյն վարժարանի աշակերտներուն համար կազմակերպուեցաւ Մկրտութեան խորհուրդի վերահաստատման խոստումի արարողութիւն:

Վարժարանի 8-րդ դասարանի աշակերտները այդ օր կատարեցին իրենց Մկրտութեան խորհուրդի վերահաստատման խոստումը, պատանի տարիքին մէջ հաստատելով ըլլալ այն, ինչ որ իրենց մանկահասակ տարիքին՝ Սուրբ Մկրտութեան ատեն կնքահօր բերնով յանձնարարուած էր իրենց որպէս հաւատաւոր քրիստոնեայ: Արարողութիւնը տեղի ունեցաւ Սուրբ Պատարագի ընթացքին, զոր մատոյց Մեսրոպեանի հոգեւոր վարիչ Տէր Ռաֆֆի քհն. Յովհաննէսեան, Սուրբ Փրկիչ եկեղեցւոյ մէջ: Արարողութեան ներկայ եղան վարժարանի տնօրէն պարոն Կրէկուար Գալուստ, ուսուցիչներ, աշակերտներու ծնողներ, կնքահայրեր ու կնքամայրեր, հարազատներ:

Տէր Ռաֆֆի իր քարոզին մէջ ըսաւ, որ պատանի խոստումնաւորները երկրի լոյսն են ու աղը՝ Յիսուս Քրիստոսի իսկ բնորոշումով, հետեւաբար կոչուած են քրիստոնէավայել կեանքի մը, որուն նպատակն է հաւատքով եւ բարի գործերով Փրկիչին լոյսը սփռել աշխարհի տարածքին: Ան յորդորեց աշակերտներու ծնողները, որ անձնական օրինակով իրենց զաւակներուն ցոյց տալ Ճշմարտութեան ճամբան եւ ամէն ջանք թափեն, որ անոնք չխոտորին երբեք:

Աշակերտները, իրենց հերթին կատարեցին անհատական եւ հաւաքական աղօթքներ՝ օրուան խորհուրդին համաձայն, հուսկ, ստորագրութեամբ վաւերացնելով իրենց խոստումը՝ ճշմարիտ քրիստոնեաներ դառնալու վերաբերեալ:

Տեղեկատուական գրասենեակ Հայ Կաթողիկէ Մեսրոպեան Բարձրագոյն Վարժարանի
 

12/12/2018, 08:10