COP27․ Սուրբ Աթոռը կը յորդորէ հրատապ և պատասխանատու կերպով կայացնել որոշումներ
Մարիամ Երեմեան – Վատիկան
Հրատապութիւն և պատասխանատուութին․ ասոնք են Շարմ Էլ-Շեյխի մէջ տեղի ունեցող COP27-ի աշխատանքին համար երկու հիմնարար ուղեցոյցները, որոնք կ’արտայայտուին Սուրբ Աթոռի դիրքորոշումի մէջ։
Այդ մասին խօսած է Եգիպտոսի մօտ Սուրբ Աթոռի Առաքելական նուիրակ և Արաբական Պետութիւններու Լիկայի մօտ Սուրբ Աթոռի պատուիրակ, Գերապայծառ Նիքոլաս Թեւենինը, կլիմայի փոփոխութեան հարցերով Եգիպտոսի գագաթնաժողովի ընթացքին։
Ան շեշտած է, որ «Կլիմայական ճգնաժամը կ’ազդէ չափազանց շատ մարդկանց և յատկապէս ամենէ աղքատ և խոցելի խաւերուն վրայ», ուստի անհրաժեշտ են առարկայական գործողութիւններ, Փարիզի համաձայնագիրի չորս հիմնասիւները՝ մեղմացում, յարմարեցում, ֆինանսաւորում և համագործակցութիւն, ամրապնդելու համար։
Կրթութեան կարևորութիւնը
Պապական նուիրակը իր վերլուծական ելոյթին մէջ շեշտած է, որ քաղաքական, մասնագիտական և գործառնական միջոցառումները, որոնք այլևս բաւարար չեն, պէտք է զուգադրուին, «նոր ապրելակերպ խթանող կրթական մօտեցումի հետ», յօգուտ զարգացման և կայունութեան նորացուած տիպարի՝ հիմնուած խնամքի, եղբայրութեան և համագործակցութեան վրայ:
Գերապայծառ Թեւենինը վեր հանած է Սուրբ Աթոռի կողմէ մատնանշուած մէկ այլ խնդիր՝ այն, որ չի կարելի անտեսել կլիմայի, սնունդի և ջուրի միջև կապը, հետևաբար սննդային համակարգի հանդէպ համապատասխան մօտեցումը «կարող է և պէտք է էական դեր խաղայ կլիմայական քաղաքականութեան մէջ»:
Ի վերջոյ, Վատիկանի դիւանագէտը մէջբերած է Ֆրանչիսկոս Սրբազան Քահանայապետի խօսքերը անցեալ կիրակի՝ նոյեմբեր 13-ին Մարեմեան աղօթքի ատեն, որ յոյս յայտնած է, որ Եգիպտոսի մէջ ընթացող գագաթաժողովին «խիզախութեամբ և վճռականութեամբ առաջընթաց արձանագրուի Փարիզի համաձայնագիրի ուղեծիրէն ներս»:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
