Cerca

Vatican News
Սուրբ Յովհաննէս Պօղոս Բ Սուրբ Յովհաննէս Պօղոս Բ 

Սուրբ Յովհաննէս Պօղոս Բ Քահանայապետի մահուան 14-րդ տարեդարձը:

Անոր յուղարկաւորութիւնը տեղի ունեցաւ 8 ապրիլ 2005ին։ Մինչ այդ, շուրջ երեք միլիոն անձ այցելեց սուրբ Պետրոսի Տաճարը անոր վերջին հրաժեշտը տալու համար։
Սուրբ Յովհաննէս Պօղոս Բ Քահանայաետի մահուան 14-րդ տարեդարձը:

Ռոպէր Աթթարեան - Վատիկան

2 ապրիլին կը յիշատակուի  Սուրբ Յովհաննէս Պօղոս Բ քահանայապետի մահուան 14-րդ տարեդարձը։ Ան  իր մահկանացուն կնքած է  Վատիկանի մէջ, 2 Ապրիլ 2005ին, երեկոյեան ժամը 9։37ին։

Քարոլ  Վոյթիլա, որ յետ քահանայապետական ընտրութեան` 1978 հոկտեմբերին, կը ստանայ Յովհաննէս Պօղոս Բ.  անունը, ծնած էր 18 Մայիս 1920ին Վատովիս գիւղը, որ Քրաքովիայէն մօտ 50 քմ. հեռաւորութեան վրայ կը գտնուի։

Քահանայական ձեռնադրութիւնը ընդունած էր ՝ 1 նոյեմբեր 1946-ին, ձեռամբ կարդինալ Ատամ Սթէֆան Սաբիեհայի:

 Յուլիս 1958-ին, Պիոս 12-րդ Քահանայապետը զինք կ՚անուանէ տիտղոսաւոր առաջնորդ Օմպիի եւ փոխանորդ Քրաքովիոյ: 28 սեպտեմբերին կը ստանայ եպիսկոպոսական օծումը ձեռամբ արհիապատիւ Էօճէնիուս Պազիաքի։

13 Յունուար 1964-ին, Պօղոս 6-րդ քահանայապետը զինք կ՚անուանէ Արքեպիսկոպոս Քրաքովիոյ, շնորհելով անոր նաեւ Կարդինալական աստիճանը:

1978-ին, կարդինալական ժողովի 2-րդ նիստին, ան կ՚ընտրուի Քահանայապետ` ստանալով Յովհաննէս Պօղոս Բ. անունը: 22 Հոկտեմբերին պաշտօնապէս սկիզբ կ՚առնէ անոր պաշտօնավարութիւնը որպէս 263-րդ յաջորդ Պետրոսի Աթոռին: Անոր Քահանայապետութեան շրջանը կը տեւէ 27 տարի եւ կը հանդիսանայ Եկեղեցւոյ պատմութեան ամէնէն երկարատեւ շրջաններէն մէկը:

Քահանայապետական 27 տարիներու ընթացքին, Յովհաննէս Պօղոս Բ. Իտալիայէն դուրս 104 առաքելական ճամբորդութիւններ կատարեց, ինչպէս նաեւ 146 այցելութիւններ Իտալիոյ մէջ: Իսկ որպէս Հռոմի եպիսկոպոս, ան կարողացաւ այցելել իր թեմին պատկան 333 եկեղեցիներէն 317 ժողովրդապետութիւններ:

Անոր յուղարկաւորութիւնը տեղի ունեցաւ 8 ապրիլ 2005ին։ Մինչ այդ, շուրջ երեք միլիոն անձ այցելեց սուրբ Պետրոսի Տաճարը անոր վերջին հրաժեշտը տալու համար։

Յովհաննէս Պօղոս Բ երջանկայիշատակ քահանայապետը Սուրբերու շարքին դասուեցաւ 27 ապրիլ 2014-ին, Ֆրանչիսկոս Սրբազան Քահանայապետի ձեռամբ Սուրբ Պետրոսի հրապարակին վրայ մատուցուած հանդիսաւոր պատարագի մը ընթացքին, որուն առթիւ Սուրբ հռչակուեցաւ նաեւ Յովհաննէս ԻԳ քահանայապետը, մինչ արարողութեան ներկայ գտնուեցաւ նաեւ վաստակաւոր Քահանայապետ Պենետիկտոս ԺԶ։

02/04/2019, 08:54