Հայ Կաթողիկէ Պատրիարքական Եկեղեցին ունեցաւ երկու նոր եպիսկոպոսներ

Ռոպէր Աթթարեան - Վատիկան

Չորեքշաբթի` 3 ապրիլ 2024ին Ֆրանչիսկոս Սրբազան Քահանայապետը, իր հաւանութիւնը տուաւ հրատարակելու Հայ Կաթողիկէ Եկեղեցւոյ սիւնհոդոսի կողմէ ընտրուած` երկու նոր եպիսկոպոսներու նշանակումին լուրը։ 

Առաջինը` Հայր Գրիգոր Վարդապետ Պատիշահն է, որ նշանակուեցաւ Պէյրութի Հայ Կաթողիկէ Թեմին օգնական եպիսկոպոս, իսկ երկրորդը` Հայր Բարսեղ Ծ. վարդապետ Պաղտասարեանն է, որ նշանակուեցաւ Միացեալ նահանգներու ու Քանատայի Կլէյնտէլի Տիրամայր Նարեկ Թեմին օգնական եպիսկոպոս։ 

Սուրբ Աթոռի մամլոյ գրասենեակին կողմէ հրատարակուած հաղորդագրութիւններուն մէջ կը կարդանք

Գերապ. Գրիգոր վարդ. Պատիշահ

Հայր Գրիգոր (Ռոպէր) Պատիշահը

«Տանն Կիլիկիոյ Կաթողիկէ հայոց Պատրիարքական Եկեղեցւոյ սիւնհոդոսը Պէյրութի Հայ Կաթողիկէներու Թեմին օգնական եպիսկոպոս ընտրեց` Հայր Ռոպէր Գրիգոր Պատիշահը, որ այժմ կը վարէ Զմմառու Պատրիարքական նորընծայարանի մեծաւորի պաշտօնը եւ Սիւնհոդոսի քարտուղարն է։ Քահանայապետը անոր վերագրեց Հայոց Արտուինի տիտղոսաւոր Աթոռը։

Հայր Գրիգոր Պատիշահը ծնած է Պէյրութ` Լիբանան, մէկ Փետրուար 1983ին։ Զմմառու փոքր նորընծայարան մտած է երիտասարդ հասակին, ապա յաճախած է Հարիսայի Սուրբ Պօղոս համալսարանը փիլիսոփայական ու աստուածաբանական ուսմունքներուն համար։ 

2007ին կը փոխադրուի Հռոմ` Լեւոնեան Ք. Վարժարան, շարունակելու համար իր ուսմունքը ու կ՛աւարտէ Եկեղեցւոյ Ընկերային Վարդապետութեան համալսարանական մասնաճիւղը` Յիսուսեաններու Գրիգորեան Համալսարանէն ներս, ինչպէս նաեւ Ընտանիքի Աստուածաբանութեան մասնաճիւղը, Յովհաննէս Պօղոս Բ-ի անուամբ Քահանայապետական ուսումնարանէն ներս, ապա ձեռք կը բլերէ նաեւ «կազմաւորողի» վկայականը, Սալեզեաններու Քահանայապետական Համալսարանէն ներս։ 

Քահանայ կը ձեռնադուրի 11 դեկտեմբեր 2010ին։ Անդամ է Զմմառու Պատրիարքական Կղերին։ 

Մէկ տարի ծառայած է Զալքայի ժողովրդապետական վարժարանէն ներս ապա 2011էն  2017 նշանակուած է Լեւոնեան Ք. Վարժարանի փոխ մեծաւոր։  Ան մինչեւ այժմ կը վարէր Զմմառու Պատրիարքական նորընծայարանի ռեկտորի  եւ Սիւնհոդոսի քարտուղարի պաշտօնները։

Գերապ. Բարսեղ վրդ. Պաղտասարեան

Հայր Բարսեղ (Մանուէլ) Ծ. վարդապետ Պաղտասարեան

Սրբազան Քահանայապետը Կլէյնտելի Տիրամայր Նարեկի թեմին օգնական եպիսկոպոս նշանակեց Հայր Բարսեղ (Մանուէլ) Ծ. վարդապետ Պաղտասարեանը, որ այժմ Լոս Անճելըսի Սուրբ Գրիգոր Լուսաւորիչ Աթոռանիստ Եկեղեցւոյ Ժողովրդապետն է, որուն շնորհուեցաւ հայաստանի Քոմանայի տիտղոսաւոր Աթոռը։ 

Հայր Բարսեղ Պաղտասրեանը ծնած է 21 Փետրուար 1975ին Լիբանանի մայրաքաղաք Պէյրութի մէջ ու մուտք գործած է Զմմառու Սուրբ Միքայէլ նորընծայարան` 8 օգոստոս 1988ին։ 

Ան իր փիլիսոփայական ու աստուածաբանական ուսմունքները աւարտած է  1993-1996 ապա իր աստուածաբանական կազմաւորումը շարունակած է Հռոմի Գրիգորեան Համալսարանին մէջ ու Արեւելեան Եկեղեցական Կանոնագիտութեան մասնաճիւղը աւարտեց Հռոմի Քահանայպետական Արեւելեան Ինստիտուտի մէջ 1996-2001։ Հուսկ` 2011-2012 տարիներուն ստացաւ մանկավարժներու վերապատրաստման վկայականը` Սալեզեաններու Քահանայապետական  Համալսարանէն։ 

Ան Քահանայ ձեռնադրուեցաւ  2 սեպտեմբեր 2000ին Պէյրութի մէջ։ Անդամ է Զմմառու Պատրիարքական Կղերին։

2001-2002 թուականներուն նշանակուեցաւ  Սուրբ Վարդան ճեմարանի (Հալէպ, Սիրիա) փոխռեկտոր, ապա 2002-2007 թթ.՝ ծխական համայնքի պատասխանատու և Դամասկոսի (Սուրիա) Քարիթասի գանձապահ։ 2007-2017 թուականներուն ստանձնեց է Զմմառու Միաբանութեան գլխաւոր մատակարարի պաշտօնը, իսկ 2011-2017 թուականներուն դարձաւ նաև ` Մեծ և Փոքր նորընծայարաններու ռեկտոր։

2012 թուականին նշանակուեցաւ Հայ Եկեղեցական դատարանի և Մարոնի դատարանի դատաւոր։ Անիկայ Հայ Կաթողիկէ եկեղեցւոյ ներկայացուցիչն է Լիբանանի Քարիտասին մէջ։ 2017թուականէն կը վարէ Կլեյնտելի (ԱՄՆ) Տիրամայր Նարեկ թեմի Լոս Անջելեսի Սուրբ Գրիգոր Լուսաւորիչ տաճարի Ժողովրդապետի պաշտօնը։