«Մեր Հայրենիքը Երկինքն է, հետեւինք Յիսուսին` ճանապարհ, ճշմարտութիւն եւ կեանք» Ֆրանչիսկոս Պապ
Ռոպէր Աթթարեան - Վատիկան
«Այսօրուայ ծիսական աւետարանը (Յովհ. 14,1-12) քաղուած է Յիսուսին մահուընէ առաջ վերջին ճարէն։ Աշակերտներուն սիրտը խռոված է, Տէրը սակայն անոնց կ՜ուղղէ յուսադրող խօսքեր, հրաւիրելով զանոնք վախ չունենալ։ Ինք արդարեւ զանոնք չի լքեր, այլ կ՛երթայ անոնց պատրաստելու տեղ մը եւ զանոնք առաջնորդելու դէպի այդ ,նպատակը։ Յիսուս այսպիսով մեզի բոլորիս ցոյց կու տայ ուր երթալ ու միեւնոյն ժամանակ մեզի կ՛ըսէ ինչպէս հասնիլ այնտեղ»։ Այս խօսքերով է, որ Ֆրանչիսկոս Պապը կիրակի 7 Մայիսին սկիզբ տուաւ կիրակնօրեայ Մարեմեան աղօթքի խորհրդածութեան, զոր աւանդութեան համաձայն արտասանեց իր գրասենեակի պատուհանէն, Սուրբ Պետրոս հրապարակին վրայ համախմբուած հազարաւոր ուխտաւորներու ներկայութեամբ։
Ու՞ր երթալ
«Նախ եւ առաջ ո՞ւր երթալ» ըսաւ Սրբազան Պապը յիշելով Յիսուսին խօսքերը. «Իմ Հօրս տունը շատ բնակարաններ կան...Հիմա կ’երթամ, որ ձեզի տեղ պատրաստեմ’….որպէս զի ո՛ւր որ ես եմ՝ դուք ալ հոն ըլլաք»։
«Յիսուս ընտանի տունին պատկերը կը գործածէ, վայր` յարաբերութիւններուն ու մտերմութեան։ «Հօրս տան մէջ տեղ կայ բոլորին» կ՛ըսէ Յիսուս», յարեց ի միջի այլոց Սրբազան Պապը հաստատելով, թէ Յիսուսին Խօսքը աղբիւր է մխիթարութեան եւ յոյսի։ Յիսուս երբեք մեզմէ չի բաժնուեցաւ եւ մեզի բացաւ ճանապարհը, կանխելով մեր վերջնական նպատակը` Հանդիպումը Հօր Աստուծոյ հետ, որուն սրտին մէջ տեղ կայ մեզմէ իւրաքանչիւրիս համար» նշեց Նորին Սրբութիւնը։
Յիսուս` ճանապարհ, ճշմարտութիւն եւ կեանք
«Ուստի երբ մենք փորձարկենք յոգնութիւնը, մոլորումը, ու նոյնիսկ ձախողութիւնը, վերյիշենք, թէ դէպի ուր ուղղուած է մեր կեանքը։ Պէտք չէ կորսնցնենք նպատակակէտը։ Միշտ պէտք է կրկնենք դէպի ո՞ւր կ՛ընթանանք հարցումը….մեր հայրենիքը Երկինքն է։ Չմոռնանք այս նպատակին մեծութիւնն ու գեղեցկութիւնը» ըսաւ Ֆրանչիսկոս Պապը ապա մատնանշեց Սուրբ Թովմասի խօսքերուն որ Յիսուսին կ՛ըսէ. «Տէ՛ր, չենք գիտեր ո՞ւր կ’երթաս եւ ի՞նչպէս կրնանք ճամբան գիտնալ»։ Եւ Յիսուս անոր կը պատասխանէ «Ես եմ ճանապարհը, ճշմարտութիւնը եւ կեանքը. մէկը Հօրը քով չի գար՝ եթէ ոչ ինձմով»։
Նմանիլ Յիսուսին ու հետեւիլ Անոր քայլերուն
«Յիսուսն է ճանապարհը, որուն պէտք է հետեւինք, ապրելու համար ճշմարտութեան մէջ եւ առատութեամբ կեանք ունենալու համար։ Ան է ճանապարհը, ուստի Անոր մէջ հաւատքը «մտքերու փաթեթ» մը չէ, որոնց պէտք է հաւատալ, այլ ճանապարհ է, որուն վրայէն պէտք է քալել, Անոր հետ ուղեւորութիւն է։ Կը նշանակէ հետեւիլ Յիսուսին, Ան դէպի երջանկութիւն տանող ճանապարհն է։ Պէտք է անոր նմանիլ մօտիկութեան եւ ուրիշներու նկատմամբ ողորմութեան արարքներուն մէջ։ Ահա այս է ուղեցոյցը Երկինք հասնելու համար. Սիրել Յիսուսը` ճանապարհը, դառնալով Անոր սիրոյ նշանները երկրի վրայ։
Յիշել նպատակակէտը
Եղբայրներ եւ քոյրեր, թոյլ չտանք որ ներկան մեզ ճնշէ, նայինք դէպի վեր, Երկինք, յիշենք նպատակակէտը, յիշենք, որ կոչուած ենք յաւիտենականութեան, Աստուծոյ հետ հանդիպումին եւ այսօր նորոգենք Յիսուսին ընտրանքը` ընտրանքը զԱյն սիրելու ու քալելու Անոր ետեւէն։
«Թող Սուրբ Կոյս Մարիամ Աստուածածինը, որ հետևելով Յիսուսին, արդեն հասած է իր նպատակին, թիկունք կանգնի մեր յոյսին» ըսաւ Քահանայապետը եզրափակելով խորհրդածութիւնը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
