Բարեխօսել աղօթքի զօրութեամբ. Կիրակնօրեայ Մարեմեան աղօթքի խորհրդածութիւն
Ռոպէր Աթթարեան. - Վատիկան
«Այսօր Իտալիոյ եւ աշխարհի այլ վայրերու մէջ կը տօնուի Տիրոջ Երկինք Համբարձման տօնը։ Տօնն մըն է, որ կը յառաջացնէ հարցումներ. Առաջին. ի՞նչու կը տօնուի Յիսուսին մեկնումը աշխարհէն եւ երկրորդ. Ի՞նչ կ՛ընէ այժմ Յիսուս երկնքի մէջ։ Ահա երկու հարցումներ, որոնք մեզ կ՛օգնեն հասկնալու այսօրուան տօնը»։
Այս խօսքերով է, որ Ֆրանչիսկոս Պապը սկիզբ տուաւ 21 մայիսի Կիրակնօրեայ «Ողջ Լեր Թագուհի» Մարեմեան աղօթքի խորհրդածութեան, զոր աւանդութեան համաձայն արտասանեց իր գրասենեակի պատուհանէն սուրբ Պետրոս հրապարակին վրայ համախմբուած հազարաւոր ուխտաւորներու ներկայութեամբ։
Ի՞նչու կը տօնախմբենք համբարձման տօնը
Նորին Սրբութիւնը նախ բացատրեց, թէ Համբարձման տօնը կը տօնենք, որովհետեւ պատահեցաւ նոր ու գեղեցիկ բան մը` Յիսուս մեր մարդկութիւնը տարաւ երկինք` այսինքն Աստուծոյ մօտ։ Այն մարդկութիւնը, զոր Յիսուս առած էր իր աշխարհ գալով բարձրացաւ դէպի Աստուած ու մշտապէս հոն պիտի մնայ։
«Այն օրէն Աստուած «փոխուեցաւ» ու մեզ այնքան սիրելու համար իր մէջ կրեց մեր մարմինը, մեր մարդկութիւնը» ըսաւ Սրբազան Պապը հաստատելով` որ մեր ճակատագիրը այնտեղ է` Երկինք։
«Այսօր կը տօնախմբենք «Երկինքի նուաճումը»։ Երկինքը այլեւս մերն է եւ Յիսուս մեզի համար բացաւ դուռ մը» յարեց Քահանայապետը։
Ի՞նչ կ՛ընէ այժմ Յիսուս
Ան ապա պատասխանելով «ի՞նչ կ՛ընէ այժմ Յիսուս» հարցումին, նշեց` որ «Հօր Աստուծոյ ցոյց կու տայ մեր մարդկութիւնը, վէրքերը` որոնցմով տառապեցաւ մեզի համար։ Կ՛աշխատի որպէս մեր փաստաբանը։ Ուստի մեզ միայնակ չթողուց։ Արդարեւ երկինք բարձրանալէն առաջ Յիսուս ըսաւ «Ես ձեր հետն եմ մինչեւ աշխարհիս կատարածը (Մատթ. 28,20)։ Յիսուս միշտ մեր հետն է` Ան կը բարեխօսէ մեզի համար Հօրը մօտ։
«Բարեխօսութիւնը հիմնական է. չի կորսնցնենք յոյսը, որովհետեւ Հօր մօտ կայ մէկը որ կը բարեխօսէ մեզի համար» ըսաւ ապա Ֆրանչիսկոս Պապը հուսկ խնդրեց` որ «Երկնքի Թագուհին օգնէ մեզի` որպէսզի բարեխօսենք աղօթքի զօրութեամբ»:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
