Օգտագործեցէք ձեր ժամանակը լաւ և պատասխանատու կերպով․ Ֆրանչիսկոս Պապը երիտասարդներուն
Մարիամ Երեմեան - Վատիկան
Ֆրանչիսկոս Սրբազան Քահանայապետը լսատեսողական պատգամ յղած է Global Youth Tourism Summit- Երիտասարդական զբօսաշրջութեան ընդհանրական գագաթաժողովի մասնակիցներուն, որ տեղի կ՛ունենայ իտալական Սորենթo քաղաքին մէջ Յունիս 27-էն Յուլիս 3-ը։
Ֆրանչիսկոս Պապը իր ուրախութիւնը արտայայտած է երիտասարդներուն՝ Երիտասարդական զբօսաշրջութեան ընդհանրական առաջին հանդիպումի առիթով։
Կամաւորական աշխատանք, ընտանիքին օգնութիւն, աղօթք
Քահանայապետը նկատած է, որ անոնց համար, որոնք տակաւին պատանի են, զբօսաշրջութիւնը կը համընկնէ դպրոցական արձակուրդային շրջանին հետ և ունեցած փորձառութիւնները կը մնան յիշողութեան մէջ։ Ան նշած է, որ այդ հանգիստի ժամանակը շատերը կը զբաղին կամաւորական աշխատանքներով, միւսները ընտանիքին ձեռք մեկնելով, երրորդները լուռ աղօթելով և Աստուծոյ մօտիկութիւնը փնտռելով։
«Բոլոր պարագաներուն, ես կը խրախուսեմ ձեզ լաւ և պատասխանատու կերպով օգտագործել ձեր տրամադրութեան տակ եղած ժամանակը․ այդպէս է, որ կարելի է աճիլ և ստանձնել առաւել պարտաւորեցնող գործեր», ըսած է Ֆրանչիսկոսը մաղթելով` որ անոնք ըլլան ապագայի յոյսի և վերածնունդի աւետաբերներ, օրհնելով զանոնք։
Մտքերու փոխանակում երիտասարդներու և ոլորտի առաջատարներու միջև
Քամփանիայի ափին գտնուող Սորենթo քաղաքին մէջ այս օրերուն հաւաքուած են 12-էն 18 տարեկան 130 պատանիներ 60 երկրներէ, մասնակցելու իր տեսակին մէջ առաջին այդ միջոցառումին, որ կազմակերպած է Զբօսաշրջութեան համաշխարհային կազմակերպութիւնը՝ Իտալիոյ Զբօսաշրջութեան նախարարութեան և Զբօսաշրջութեան ազգային գործակալութեան հետ համագործակցութեամբ։
Երիտասարդները պիտի ունենան հանդիպումներ և մտքերու փոխանակումներ ոլորտի առաջատարներու հետ, որոնց շարքին ՝ քաղաքական գործիչներ, ինչպէս նաև մարմնամարզութեան, նպարեղէնի, զուարճանքի և նորարարութեան աշխարհի առանցքային դէմքեր: Գագաթնաժողովը ստացած է Իտալական Հանրապետութեան Նախագահի մեդալ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ