Ֆրանչիսկոս Պապին Հռոմի Հրեաներու աւագ Տաճար այցելութեան հինգերորդ տարեդարձը։

Ռոպէր Աթթարեան - Վատիկան

Այսօր   17 Յունուարին կը յիշատակուի Ֆրանչիսկոս Պապին  Հռոմի Հրեաներու Աւագ Տաճար` ''Սինակոկ'' այցելութեան հինգերորդ տարեդարձը (17 Յունուար 2016)։ Այդ մէկը պատմութեան մէջ եղաւ Հռոմի հրեաներու տաճարին տուած Քահանայապետի մը երրորդ այցելութիւնը ։ Արդարեւ առաջին ու պատմական այցելութիւնը տեղի ունեցած է 13 ապրիլ 1986-ին Սուրբ Յովհաննէս Պօղոս Բ քահանայապետի օրով։  Սուրբ ՅՊԲ եղաւ առաջին Քահանայապետն որ այցելեց Հռոմի Հրեաներու Մայր տաճարը, այդ օրուայ Րաբունապետ Էլիօ Թոաֆի հրաւէրով։

 Պենետիկտոս ԺԶ վաստակաւոր Քահանայապետը եւս այցելեց տաճարը՝ 17 Յունուար 2010-ին։  Ան  Քահանայապետութեան  շրջանին այցելեց նաեւ  հրէական երկու այլ տաճարներ` Գերմանիոյ Քոլոնիա քաղաքի տաճարը` 19 օգոստոս 2005-ին, երիտասարդութեան համաշխարհային օրուայ առթիւ Գերմանիա կատարած առաքելական այցելութեան ընթացքին, եւ Նիւ Եորքի Սինակոկը` 18 ապրիլ 2008-ին Միացեալ Նահանգներ կատարած առաքելական ճամբորդութեան ծիրէն ներս։

Իր նախորդին նման Ֆրանչիսկոս Պապ`  հրեաներու տաճարը այցելեց  17 յունուարին, Հրեաներու եւ Կաթողիկէներու միջեւ երկխօսութեան զարգացման ու խորացումի 27-րդ օրուան առթիւ։ Ֆրանչիսկոս Պապ Սուրբ Յովհաննէս Պօղոս Բ նման Հրեաները որակեց «Աւագ Եղբայրներ»։