Ֆրանչիսկոս Պապին կոչը մանուկներու պաշտպանութեան ի խնդիր։

Վազգէն Աբարդեան - Վատիկան

Չորեքշաբթի, 10 յունիսին, Հրապարակային ընդհանուր ունկնդրութեան ընթացքին, Ֆրանչիսկոս Պապ անդրադառնալով յառաջիկայ 12 յունիսին, մանուկներուն աշխատանքի շահագործումի դէմ միջազգային օրուան, կոչ յղեց պաշտպանելու մանուկներու ապագան, ընդգծելով, որ մանուկները մարդկային ընտանիքին ապագան են։

Կոչին մէջ Սրբազան Հայրը ըսաւ. «Յառաջիկայ ուրբաթ, 12 յունիսին, անչափահասներուն աշխատանքի շահագործումի դէմ համաշխարհային օրն է, երեւոյթ մը որ  մանուկները կը զրկէ իրենց մանկութենէն եւ կը խաթարէ համապարփակ զարգացումը» ։

Քահանայապետը ապա աւելցուց՝ թէ«Առողջապահական ճգնաժամային այժմեան իրավիճակին մէջ տարբեր երկիրներու մէջ բազմաթիւ մանուկներ ու պատանիներ, ստիպուած են իրենց  տարիքին անպատշաճ աշխատանքներ կատարել,  օգնելու համար իրենց ընտանիքները, որոնք կը գտնուին յետին աղքատութեան մէջ։  Բազմաթիւ պարագաներու մէջ,  անոնք ստրկութեան եւ բանտարկութեան  ձեւեր են, որոնք կը պատճառեն ֆիզիքական ու հոգեբանական տառապանքեր։ Բոլորս պատասխանատու ենք անոր համար» հաստատեց Սրբազան Պապը կոչ ուղղելով ի պաշպանութին մանուկներուն։ 

«Կոչ կ՝ուղղեմ հաստատութիւններուն, որպէսզի ի գործ դնեն ամէն ջանք՝ պաշտպանելու համար անչափահասները, լիացնելով տնտեսական եւ ընկերային բացերը, որոնք հիմքն են աղաւաղուած շարժաբանութեան մը,  որուն մէջ անոնք  դժբախտաբար ներգրաւուած են» ըսաւ ֆրանչիսկոս Պապ, ապա եզրափակեց կոչը ընդգծելով. «Մանուկները մարդկային ընտանիքին ապագան են, բոլորիս կ՝իյնայ սատարել անոնց աճումին, երջանկութեան եւ առողջապահութեան»։