Որոնել

Vatican News
Ով Քաղցրագութ սիրտ Յիսուսի Ով Քաղցրագութ սիրտ Յիսուսի 

Տօն Սուրբ Սրտին Յիսուսի. Քահանաներու Սրբացման աղօթքի համաշխարհային օր։

Ով ամենաքաղցր Յիսուս. Փրկիչ մարդկային ցեղին գթալիր հայեացքդ դարձուր մեր վրայ՝. որ խոնարհաբար ինկած ենք Քու սեղանիդ ոտքը։
Ունկնդրէ լուրը

Ռոպէր Աթթարեան - Վատիկան

Կաթողիկէ Եկեղեցին Յունիս ամիսը նուիրած է Յիսուսի Սուրբ Սրտի պաշտամունքին որուն առթիւ կը կատարուին ջերմեռանդական աղօթքներ նուիրուած մեր Տիրոջ ու Փրկիչ ողորմած եւ սէրով լեցուն Սուրբ Սրտին:

Այս գեղեցիկ ջերմեռանդութիւնը սկիզբ  առած է Արևմուտքի մէջ եւ մուտք գործած է նաև հայ կաթողիկէ համայնքներուն մէջ:  Սոյն ջերմեռանդութիւնը,  կը յիշեցնէ` մարդկութեան հանդէպ Տիրոջ անհատնում սէրը և այդ սիրոյն փոխադարձ սիրով պատասխանելու անհրաժեշտութիւնը։

Յունիս ամսուայ ընթացքին կը յիշատակուի նաեւ Յիսուսի Սուրբ Մարմնոյ եւ Արեան տօնը որուն կը յաջորդէ Յիսուսի Սուրբ Սրտին տօնը, որուն կը զուգադիպի նաեւ Քահանաներու Սրբացման աղօթքի համաշխարհային օրը, որ  հաստատուած է Սուրբ Յովհաննէս Պօղոս Բ Քահանայապետի կողմէ 1995 թուականին եւ այս տարի կը բոլորէ 25 ամեակը։

Օրը նպատակ ունի Քահանաներուն յիշեցնելու որ «մարդիկը կը փափաքին քահանային մէջ տեսել Քրիստոսին դիմագիծը», անիկա առիթ է նաեւ միասին խորհրդածելու՝ քահանայական կոչումի պարգեւի մասին, Քահանան որ այլ ոմն Քրիստոս է, որուն յանձնուած է Աստուծոյ Ժողովուրդի հովութիւնը ու անոր դէպի երկինք առաջնորդելու պարտականութիւնը։

Աղօթք առ Սուրբ Սիրտն Յիսուսի

Ով ամենաքաղցր Յիսուս. Փրկիչ մարդկային ցեղին

գթալիր հայեացքդ  դարձուր մեր վրայ՝. որ խոնարհաբար ինկած ենք Քու սեղանիդ ոտքը։

Տուր Տէր բոլոր ազգերուն խաղաղութիւն ու սէր.

որպէսզի աշխարհի մէկ ծայրէն մինչեւ միւս ծայրը հնչէ դա օրհներգը.

Գովութիւն եւ գոհութիւն աստուածային ԱՄԵՆԱՍՈՒՐԲ Սրտին Յիսուսի որուն կը պարտինք մեր փրկութիւնը. Ամէն։

-----------------------

Յիսուսի Սուրբ Սրտի տօնին առթիւ՝ ուրբաթ 19 Յունիսի ժամը 11.30-ին, Ֆրանչիսկոս Սրբազան Քահանայապետը հրապարակեց հետեւեալ թուիթը։

«Տէրը մեզի մշտապէս կը նայի ողորմութեամբ։ Վախ չունենանք մօտենալու Անոր. Ան ունի ողորմած սիրտ մը։ Եթէ Անոր ցոյց տանք մեր ներքին վէրքերը, մեր մեղքերը, Ան մեզ մշտապէս կը ներէ։ Լոկ ողորմութիւն է։ Երթանք Յիսուսին»։

---------------------

Աւելի ուշ՝ ժամը 15-ին Սրբազան Քահանայապետը հրապարակեց նոր թուիթ մը որուն մէջ յիշեց քահանաները ու խնդրեց աղօթել անոնց համար։

«Ձեզ կը հրաւիրեմ աղօթելու քահանաներուն համար, որպէսզի ձեր աղօթքներու միջոցաւ Տէրը զանոնք ամրապնդէ իրենց կոչումին մէջ, ամոքէ՝ իրենց առաքելութեան մէջ եւ ըլլան միշտ Աւետարանի ուրախութեան ծառայողները՝ բոլոր ազգերուն համար»

 

19/06/2020, 07:18