«Կիրակին Սուրբ Պահէ» Հայր Գէորգ Եպիս Ասատուրեանի շաբաթական խորհրդածութիւնը
Օր մը, երբ մեթրոյէն կ'ելլէի, մեծ ծանուցում մը ուշադրութիւնս գրաւեց՝ «Պայքարեցէ'ք Կիրակի օրը աշխատելու դէմ» : Կարելի է խորհիլ Կիրակի օրուան իմաստին մասին որպէս «Տիրոջ օր» քրիստոնեաներուս համար եւ հետեւաբար, աղօթքին եւ աղօթելու նշանակութեան մասին : Արդեօ՞ք կիրակնօրեայ գործը պիտի փոխարինէ Կիրակի օրուայ աղօթքը:
Պատասխան մը ունենալու համար, հարկ է վերադառնալ Հին Կտակարանին եւ մեր քրիստոնէական պատմութեան :
Երբ մենք մեզ կը հարցնենք թէ ինչո՞ւ կ'աշխատինք, բազմաթիւ պատասխաններ կը յայտնուին մեր առջեւ: Նախ եւ առաջ, կ'աշխատինք ապրելու եւ սնանելու համար, զարգանալու համար, ճանչցուելու համար ընկերային կեանքին մէջ, եւ վերջապէս կը նկատենք գործը իբրեւ պարտականութիւն եւ պաշտօն : Բոլոր մարդկութեան պատմութեան ընթացքին, գործը կարեւոր մաս կազմած է մարդուն եւ կնոջ կոչումին. «մարդը կ'ապրի պարտէզին մէջ՝ զայն մշակելու եւ պահելու համար» (Ծնն 2, 15): Գործը միշտ ներկայ իրականութիւն մըն է Հին Կտակարանին մէջ, սքանչելի իրականութիւն մը, որովհետեւ ան կարեւոր ինչք մըն է տրուած Աստուծմէ մարդուն՝ իր լաւութեան համար, որովհետեւ Ան վստահութիւն ունի մարդուն աշխատելու կարողութեան վրայ: Առ ի հետեւանք, մարդը կը մասնակցի ստեղծագործութեան վսեմ ասպարէզին եւ զայն կ'ամբողջացնէ :
Ճոն Րուսկին կ'ըսէր՝ «Աշխատելու ծայրագոյն վարձատրութիւնը այն չէ, թէ ինչ որ կը շահինք, այլ ինչ կ'ըլլանք» : Իսկ եթէ պէտք է աշխատիլ ամէն օր, նոյնիսկ կիրակի օրը, ուրեմն մենք մեզի պարտական ենք հարցնելու թէ ո՞ւր է աղօթքին տեղը մեր կեանքէն ներս եւ ինչո՞ւ կ'աղօթենք: Աղօթքը ժամանակ մըն է, երբ մարդը կը հաղորդակցի Աստուծոյ հետ : Արդ, Ան ներկայ է մարդուն սրտին մէջ եւ կեդրոնանալու ենք Ջինք գտնելու համար : Աղօթքը մեզ կու տայ բարեկեցութիւնը, շնորհք մը՝ մեր կատարելիք գործերուն մէջ եւ ըլլալու հաղորդական հանդէպ բոլոր անոնց որ մեր շուրջը կ'ապրին: Մեզ կ'արտօնէ կապ պահելու Աստուծոյ հետ եւ մեր բոլոր գործունէութիւններուն կ'ապահովէ լիուլի յաջողութիւն :
Եկեղեցին կը պատուիրէ մեզի ժամանակ մը տրամադրելու աղօթքի եւ արդէն նշանաւոր սուրբերը եղած են միշտ մեծ աղօթողներ: Աղօթել, կը նշանակէ Ասուծոյ հետ խօսիլ, զինք բարեբանելու եւ պանծացնելու, Իրեն փառք տալու եւ Իրմէ խնդրելու շնորհքները որոնց կարիքը ունինք, ինչպէս կ'ըսէր Սուրբ Օգոստինոսը : Աղօթել, կը նշանակէ արժեւորել Աստուծոյ հայեացքը մեր վրաց :
Աստուած աշխարհը ստեղծեց վեց օրէն եւ եօթներորդ օրը հանգչեցաւ : Եկեղեցին ալ կը պատուիրէ բոլորին կիրակի օրը աղօթել եւ հանգիստի տրամադրել. Յովհաննէս Պօղոս Բ. քահանայապետը իր առաքելական թուղթին մէջ մեզ կը յիշեցնէ կիրակի օրուան սրբութիւնը :
Մեր արդի ընկերութեան մէջ արժանիքները հոմանիշ են շահի, մրցակցութեան եւ շահաւէտութեան. եւ երբ այս բոլորը կը ստանանք աւելի եւս աշխատելով, կը մտածենք, թէ Աստուծոյ եւ աղօթքի տեղ չկայ : Արդե՞օք Հին Կտակարանին ոսկի յորդը դարձեալ պիտի պաշտենք... : Յուսանք թէ ո՛չ...
Որպէս եզրակացութիւն, մէջբերենք Յովհաննէս Պօղոս Բ. քահանայապետի հետեւեալ խօսքերը «Տիրոջ Օրը» առաքելական թուղթէն՝ «Յիսուսի տրամադրուած ժամանակը կորսուած ժամանակ չէ, այլ շահի ժամանակ մը մեր յարաբերութիւններուն խորունկ մարդկայնութեան» :
Տիրոջ օրը այն կարեւոր օրն է մարդուն եւ Աստուծոյ միջեւ յարաբերութիւններուն համար, երբ մարդը իր Տիրոջ երգեր կը բարձրացնէ, կը ներկայացնէ ամբողջ իր մարդկութեան :
Տիրոջ օրուան ներկայութիւնը մեզ կը յիշեցնէ, թէ տիեզերքն ու պատմութիւնը Աստուծոյ կը պատկանին, եւ թէ մարդը չի կրնար նուիրագործուիլ իր արարչական ասպարէզին մէջ առանց յիշելու այս իրականութիւնը :
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ