Անարատ Յղութեան Հայ Քոյրերու Միաբանութեան ընդհանուր ընտրական Ժողովը
Սոյն թուականի, Յուլիսի 17-ից 28, Լիբանանի Զմմառու Նախախնամութեան վանքին մէջ, տեղի ունեցաւ Անարատ Յղութեան Հայ Քոյրերու Միաբանութեան հերթական վեցամեայ ընտրական Ընդհանուր Ժողովը որուն մասնակցեցան 33 անդամներ:
Ընդհանուր Ժողովէն առաջ Քոյրերը կատարեցին երեքօրեայ կրթութիւն, առաջնորդութեամբ Գերապատիւ Գէորգ Ծ.Վրդ. նորատունկեանի որ յատուկէն կանչուած էր Լիոնէն սոյն կրթութիւնը քարոզելու համար:
Կրթութենէն յետոյ, իրենց շրջանը աւարտող Ընդհանուր Մեծաւորուհին և Ընդհանուր մատակարարը, ժողովին ներկայացուցին վեցամեայ տեղեկագիր մը Միաբանութեան գործունէութեան և տնտեսական վիճակին մասին:
Ուրբաթ, 21 Յուլիսին, տեղի ունեցաւ Ընդհանուր մեծաւորուհիի ընտրութիւնը, նախագահութեամբ Ամենապատիւ և Գերերջանիկ Ռաֆայէլ-Պետրոս ԻԱ. Մինասեանի, Կաթողիկոս-Պատրիարք Տանն Կիլիկիոյ Կաթողիկէ Հայոց:
33 ժողովական Քոյրերու քուէներու մեծամասնութեամբ վերընտրուեցաւ Քոյր Արուսեակ Սաճոնեան, վեցամեայ նոր շրջանի մը համար:
Հոգեւոր Տէրը պարտաւորութիւն դրաւ իւրաքանչիւր քրոջ նուազագոյն մէկ կոչում մը ապահովել:
Շաբաթ, 22 յուլիսին, տեղի ունեցաւ նոր վարչութեան անդամներու ընտրութիւնը: Կրկին քուէներու մեծամասնութեամբ ընտրուեցան հետեւեալները.
Քոյր Լուիզա Քասարճեան, Ընդհանուր փոխանորդ
Քոյր Նելլի իսին, Բ.րդ ընդհանուր և խորհրդականուհի
Քոյր Հակինթա Մուրատեան, Գ.րդ ընդհանուր խորհրդականուհի
Քոյր Նարինէ Սիմոնեան, Դ. րդ ընդհանուր խորհրդականուհի
Պաշտօնակիցներ՝
Քոյր Նարինէ Սիմոնեան, ընդհանուր քարտուղարուհի
Քոյր Յովհաննա Արոյան, ընդհանուր մատակարարուհի
Յուլիս 24-ի շաբաթը տրամադրուեցաւ անմիջական զանազան հարցերու ապահովելու համար Միաբանութեան վերելքը և անոր գոյատեւումը որպէսզի կարենայ շարունակել իր անփոխարինելի առաքելութիւնը դաստիարակելու հայ սերունդը հաւատարմօրէն պահելու իր դարաւոր կրօնքը և հայեցի սրբութիւնները, օգնելու որբին և չքաւորին անխտիր, Սփիւռքի և Հայրենիքի մէջ,: Երկարօրէն խօսուեցաւ նոր կոչումներ որոնելու միջոցներու մասին:
Անարատ Յղութեան Հայ Քոյրերու Միաբանութեան Ընդհանուր Ժողովը աւարտեցաւ եղբայրական սեղանի շուրջ, հայութիւն և անխորտակելի պայքար մղող հայադրոշմ Այնճարի մէջ:
Դիւան` Հայր Քոյրերու Անարատ Յղութեան Միաբանութեան
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
