Սուրբ Ներսէս Շնորհալի` Մեծ հայրապետն հայոց. Ներսէս Կլայեցի Կաթողիկոս – «Թուղթ ընդհանրական»ը - Զ մաս
Աշխարհական դասին երրորդ խմբակի ներկայացուցիչները՝ որոնց Ս. Ներսէս Կլայեցի Հայրապետը կոչ կ՚ուղղէ՝ քաղաքի բնակիչներն են, արհեստաւորները եւ անոնք որ վաճառափողոցները նստած՝ առեւտուր կ՚ընեն։ Շնորհալի կը քաջալերէ որ ուղիղ եւ անարատ կեանք վարեն, զգուշացնելով հեռու մնալ խաբէութենէ, նենգութենէ, սուտէ եւ սուտ երդում ընելէ՝ որովհետեւ Աստուած պիտի դատէ գողերը եւ խարդախները, այնպէս որ զգոյշ ըլլան երկու չափ եւ երկու կշիռ գործածելէ, «որպէսզի տուժածներու անէծքով ձեր գոյքը չայրի, - կ՚ըսէ- այլ Աստուծոյ օրհնութիւնը ձեր տուները մտնէ»։ Կրկին ու կրկին անգամ կը յանձնարարէ վաշխառութեամբ չզբաղիլ եւ աղքատին փոխ տուածը՝ տոկոսով չպահանջել, այլ կարօտեալին եւ աղքատին ողորմութիւն տալ՝ փոխարէնը Քրիստոսէն ստանալու համար։
Անցնելով հողագործներուն եւ գիւղի ժողովուրդին՝ կը հաստատէ թէ առաւելաբար այս խումբի մարդիկ հոգեւոր դեղի կը կարօտին՝ առողջանալու համար մեղքի հիւանդութենէն եւ կը թուարկէ այն բոլոր մեղքերը՝ որ ամէն օր վտանգի կ՚ենթարկեն մարդը, եւ չարի ծուղակները ցոյց տալէն ետք՝ անմիջապէս կը նշէ բարին գործելու խթանիչ պատճառաբանութիւնը։ Կ՚աղաչէ անձնատուր չըլլալ անցաւոր կենցաղի հաճոյքներուն՝ չկորսնցնելու համար յաւիտենական բարիքները։ Կը յիշեցնէ որ մկրտութեամբ Աստուծոյ տաճար ենք՝ սուրբ Հոգիին բնակարան, ու կը յորդորէ. «մի՛ ապականէք Աստուծոյ տաճարը պղծալից պոռնկութեամբ եւ շնութեամբ, որպէսզի Աստուած ալ դատաստանի օրը ձեզ չապականէ գեհենի կրակով»։ «Մի՛ գինովնաք, զեխութիւն եւ յիմարութիւն է, եւ մայրն է պոռնկութեան, ամէն պղծութեան, անիրաւութեան, վէճի, անարգական կեղտոտ խօսքերու՝ որմէ կ՚առաջանան սպանութիւններ»։ Կը զգուշացնէ որ հայհոյանքներով լեզուն սատանայի գործիքի չվերածեն։ Հայրաբար կը խրատէ ըսելով. «Դարձեալ, այս պատուէրն ալ կ՚աւանդեմ ընդհանուր բոլոր հաւատացեալներուդ, որ ձեր մանուկները սնուցանէք Աստուծոյ երկիւղով, մանուկ հասակնէն խրատելով աստուածասէր ըլլալ, ողորմած, աղօթասէր։ Աղօթքի խօսքերը սորվեցուցէ՛ք անոնց»։
Եզրակացնելով՝ Ս. Ներսէս կը գրէ. «Ամէն բարիքի գլխաւորը՝ սէր ունեցէք իրարու հանդէպ, եւ կարեկցանք եւ ողորմութիւն՝ աղքատին, մերկին, հիւրին, բանտարկեալին եւ հիւանդին, որոնց շնորհիւ արքայութեան ժառանգորդ պիտի դառնաք Քրիստոս Յիսուսի մէջ»։
Ամէնէն վերջը, Շնորհալի հայրապետը խօսքը կ՚ուղղէ կիներու դասին, յանձնարարելով որ, ինչպէս քրիստոնեային կը վայելէ, պարկեշտ ըլլան, ամօթխած եւ պատկառելի, եւ երբեք ցանկասիրութեամբ երիտասարդներուն գայթակղութեան պատճառ չդառնան, եւ կաւատութեամբ, կախարդութեամբ եւ դեղատուութեամբ երբեք չզբաղին։ Երեքն ալ սատանայի ծառայի գործ ըլլալով՝ «Օձի անէծքը պիտի ժառանգէ այնպիսին... սատանայի հետ պիտի դատապարտուի գեհենի կրակին... եւ անոր հետ պիտի այրի յաւիտեան»։
«Թուղթ Ընդհանրական»ը աւարտելով՝ սուրբ Ներսէս Շնորհալի խորհուրդ կու տայ դիմել քահանաներու եւ եպիսկոպոսին՝ որ տեսուչ կարգուած են հոգիներուն՝ սորվելու համար մնացած ճշմարտութիւնները։ «Իսկ ես պիտի աղաչեմ Տէրը, որպէսզի ձեզմէ հանէ քարէ սիրտը եւ տայ ձեզի մարմնեղէն սիրտ՝ արգաւանդ երկիր ըլլալու եւ խօսքիս սերմը արդիւնաւորելու համար ձեր հոգիներուն մէջ եւ հարիւրաապատիկ պտղաբերելու, երրորդ չափին համեմատ։ Որու պատճառով զուարթերես եւ անտրտում, դատաստանի օրը արդար դատաւորին առջեւ ըսեմ. Ահա ես եւ իմ զաւակներս՝ որ ինծի տուիր. եւ ձեզի հետ միասին դասուիմ աջակողմեաններուն հետ, մեր Տէր Յիսուս Քրիստոսի մէջ, որ օրհնեալ է յաւիտեան, ամէն»։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ