Որոնել

Vatican News
Միաբանական հաւաք՝ Պիքֆայայի վանքին մէջ Միաբանական հաւաք՝ Պիքֆայայի վանքին մէջ 

Արամ Ա. Կաթողիկոսին նախագահութեամբ միաբանական հաւաք՝ Պիքֆայայի վանքին մէջ։

Վեհափառը Պօղոս առաքեալի կորնթացիներուն ուղղած երկրորդ նամակին 13րդ գլխուն 5-7 համարները եւ Յակոբոս առաքեալի ընդհանրական նամակի երկրորդ գլխուն 14-17 համարները մէջբերելով՝ շեշտեց հաւատքին ու հաւատարմութեան առանցքային կարեւորութիւնը մարդու կեանքին մէջ եւ զանոնք կեանքի վերածելու հրամայականը:
Ունկնդրէ լուրը

Չորեքշաբթի, 1 Սեպտեմբերի երեկոյեան, Պիքֆայայի Ս. Աստուածածին վանքին մէջ տեղի ունեցաւ միաբանական հաւաք մը՝ նախագահութեամբ Արամ Ա. կաթողիկոսին:

Վեհափառը Պօղոս առաքեալի կորնթացիներուն ուղղած երկրորդ նամակին 13րդ գլխուն 5-7 համարները եւ Յակոբոս առաքեալի ընդհանրական նամակի երկրորդ գլխուն 14-17 համարները մէջբերելով՝ շեշտեց հաւատքին ու հաւատարմութեան առանցքային կարեւորութիւնը մարդու կեանքին մէջ եւ զանոնք կեանքի վերածելու հրամայականը: «Այս երկու տարածքները մարդու կեանքին սերտօրէն ընդելուզուած են, այլ խօսքով՝ հաւատքը հաւատարմութեամբ ինքզինք կ՛արտայայտէ ու հաւատարմութիւնը նուիրումով ու ծառայութեամբ կը թարգմանուի», ըսաւ հայրապետը:

Անդրադառնալով Լիբանանի հայութեան դիմագրաւած ներկայ ահաւոր դժուարութիւններուն՝ ան շեշտեց համայնքին գործնապէս նեցուկ կանգնելու անհրաժեշտութիւնը: Այս ծիրին մէջ, ան ողջունեց Հիւսիսային Ամերիկայի Արեւելեան եւ Արեւմտեան թեմերուն մէջ տեղի ունեցող հանգանակութիւնը եւ թեմերու առաջնորդ սրբազաններուն ներկայութիւնը, հակառակ համաճարակին ստեղծած ներկայ դժուար պայմաններուն: Հայրապետը յիշեցուց, որ Մեծի Տանն Կիլիկիոյ կաթողիկոսութիւնը միշտ եղած է իր ժողովուրդին կողքին, նոյնիսկ ամէնէն դառն պայմաններուն մէջ, որովհետեւ «ժողովուրդին ծառայելով է որ եկեղեցին կը դառնայ ճշմարտօրէն եկեղեցի»:

Յայտնենք, որ առաջնորդ սրբազանները վեհափառ հայրապետին հետ ունեցած իրենց հանդիպումէն ետքայդ օր հանդիպումներ ունեցան Լիբանանի Հայոց թեմի առաջնորդ սրբազանին եւ Ազգային վարչութեան հետ՝ մօտէն հաղորդ դառնալու լիբանանահայութեան դիմագրաւած դժուարութիւններուն ու կարիքներուն:

Միաբանական հաւաքէն ետք, ներկայութեամբ կաթողիկոսին, միաբանական ընթրիք տեղի ունեցաւ Պիքֆայայի Ս. Աստուածածին վանքին մէջ:

02/09/2021, 08:38