Որոնել

Vatican News
Թեզէ գիւղաքաղաքը Թեզէ գիւղաքաղաքը  (©Matt - stock.adobe.com)

Թեզէի համամիութենական հասարակութեան հիմնադրութեան տարեդարձը։

Եղբայր Ռոժէի ծրագիրն էր հիմնել հասարակութիւն մը` որ բանայ նոր ճանապարհներ որոնք կարող ըլլային քրիստոնեաները բաժնող վէրքերը բուժելու։
Ունկնդրէ լուրը

Ռոպէր Աթթարեան - Վատիկան

20 օգոստոս 1940 թուականին զուիցերացի 25 ամեայ երիտասարդ Եղբայր Ռոժէ Շուլցի ջանքերով Ֆրանսայի Թեզէ գիւղին մէջ կը հիմնադրուէր Թեզէի համամիութենական հասարակութիւնը, որպէս քրիստոնեայ կրօնաւորական համամիութենական հասարակութիւն։

1915-ի ծնունդ Եղբայր Ռոժէ, որ ծագումով զուիցերացի էր ու մաս կը կազմէր բողոքական եկեղեցւոյ 1937-1940 տարիներուն ուսանած է Սթրազպուրկի եւ Լոզանի բողոքականներու Աստուածաբանութեան համալսարաններու մէջ եւ 1940-ին՝ 25 տարեկանին կը փոխադրուի Ֆրանսա, ուր սակայն կը հիւանդնայ թոքախտի վարակիչ հիւանդութենէ եւ ապաքինման ընթացքին անոր մէջ կը հասուննայ կրօնաւորական միաբանութիւն մը հիմնելու իղձը, որուն արժէքները ըլլան պարզութիւնը, սրտի բարութիւնը ու Աւետարանի նկատմամբ հաւատարմութիւնը։

Նոր ճանապարհներ բուժելու համար քրիստոնեաները բաժնող վէրքերը 

Անոր ծրագիրն էր հիմնել հասարակութիւն մը` որ բանայ նոր ճանապարհներ որոնք կարող ըլլային քրիստոնեաները բաժնող վէրքերը բուժելու։ Անոր այս գաղափարին բաժնեկից դարձան երկու Զուիցերացի այլ երիտասարդներ` Մաքս Թուրեան եւ Փիթր Սուվէրէնը, որոնց շուտով միացաւ երրորդ երիտասարդ մը` Տանիել Տը Մոնմոլլէն։ 1949 անոնք յանձնառու կը դառնան ապրելու կրօնաւորական կեանք մը կատարելով իրենց ուխտերը։

Հիւրընկալութեան վայր

Թեզէ գիւղաքաղաքը քիչ ժամանակուայ մէջ կը դառնայ թշուառութեան մէջ գտնուող կարիքաւոր անձերու հիւրընկալութեան տուն, անոնց շարքին էին մասնաւորապէս պատերազմէն փախչող գաղթականները ու յատկապէս հրեաները։

«Երիտասարդ տարիքէս, միշտ կռահումը ունեցած եմ թէ հասարակական կեանք մը կարող է ըլլալ նշան՝ թէ Աստուած սէր է ու միայն սէր։ Եւ ասոր համար կամաց կամաց իմ մէջս աճեցաւ համոզումը՝ թէ անհրաժեշտ էր ստեղծել  հասարակութիւն մը, իրենց կեանքը նուիրելու պատրաստ մարդոցմով , որոնք կը ջանան իրար հասկնալ ու մշտապէս հրաշութիւնը փնտռել։ Հասարակութիւն մը, ուր սրտի բարութիւնը եւ պարզութիւնը հանդիսանային ամէն ինչի կեդրոն» ըսած էր Եղբայր Ռոժէ։

Հասարակութեան ծաւալումը

1957 թուականէն ասդին Թեզէի կրօնաւորական հասարակութիւնը սկսաւ ծաւալիլ երիտասարդներու հիւրընկալութիւնը եւ ունկնդրութիւնը դարձնելով հասարակութեան յատկանշական առաքելութիւնը, որուն ապա աւելցաւ քրիստոնեաներու միութեան ի նպաստ յանձնառումը, ապա երրորդ աշխարհի մէջ ապրող բնակչութեան հանդէպ ուշադրութիւնը ու մարդասիրական օգնութիւն մատուցելը։

Թեզէյի հասարակութեան այսօր մաս կը կազմեն աշխարհի 25 երկիներէ տարբեր քրիստոնեայ դաւանանքներու պատկան հարիւրէ աւելի եղբայրներ, որոնք իրենց համամիութենական գործունէութեան ծիրէն ներս յատուկ ուշադրութիւն կը յատկացնեն երիտասարդներուն, առիթ ընծայելով անոնց իմաստ տալ իրենց կեանքին ու յանձնառու ըլլալ պատասխանատուութիւններ ստանձնելու իրենց ապրած միջավայրերուն մէջ, խրախուսելով դառնալու խաղաղութեան եւ հաշտութեան պատգամաւոր։

 

20/08/2021, 10:07