Լեհ կաթողիկէ ընտանիքներն օգնեցին արցախեան պատերազմից տուժած հայ ընտանիքների
Լեհական Վրոցլավ քաղաքում հիմնուած կաթողիկէ եկեղեցասէրների «Ընտանիքների գարուն» (Wiosna Rodzin) համայնքի անդամները՝ ջերմեռանդ և հայասեր ընտանիքներ, Սուրբ Ծննդեան տօնական օրերին Հայաստան ուղարկեցին իրենց դրամական հանգանակութիւնները և Գիւմրիի հայ կաթողիկէ համայնքի հաւատացեալներ տկն. Գոհար Շախուլեանի և պրն. Վարդան Շախուլեանի միջոցով ֆինանսական աջակցութիւն ցուցաբերեցին և նուէրներ տուեցին արցախահայ ընտանիքների, ովքեր ապաստանել են Հայ Կաթողիկէ Եկեղեցու հովանու ներքոյ, ինչպէս նաև՝ հայ կաթողիկէ համայնքներից Արցախեան պատերազմին մասնակցած և զոհուած կամ վիրաւորուած զինուորների ընտանիքներին: Ֆինանսական աջակցութիւն ստացաւ 22 ընտանիք, և Սուրբ Ծննդեան նուէրներ ստացաւ 34 երեխայ:
«Ընտանիքների գարուն» միութեան անդամները հայ ընտանիքների հետ ծանօթացել են Հ. Ռաֆայէլ Ծ. Վրդ. Կրավչիկի օգնութեամբ՝ վերջիններիս Լեհաստան այցելութեամբ, ապա լեհ ընտանիքների՝ Հայաստան երկու անգամ այցելութեամբ: Լեհերը՝ միութեան հիմնադիր Վալդեկ Բիկովսկու գլխաւորութեամբ նուիրուած են տարբեր երկրներում, այդ թւում և՝ Հայաստանում եկեղեցասէր կաթողիկէ ընտանիքների միութիւններ հիմնադրելու գաղափարին: Այս նպատակով դեռևս 2019-ի հոկտեմբերին նրանք հանդիպել էին Գիւմրիի ժողովրդապետ Տ. Գրիգոր Ավ. Քհն. Մկրտչեանի և տեղի մի քանի հայ ընտանիքների հետ, քննարկել հնարաւոր գործակցութեան ուղիները: 2020-ի փետրուարին «Ընտանիքների գարունը» օգնեց Երևանում կազմակերպել հոգևոր կրթութեան օրեր՝ հայ կաթողիկէ համայնքների մի քանի ընտանիքների համար՝ Տ. Կոմիտաս Քհն. Դավեյանի և Շախուլյանների ընտանիքի ջանքերով: Լեհ հաւատացեալները մտադիր էին ևս մէկ հոգևոր կրթութիւն հովանաւորել Հայաստանում՝ 2020-ի օգոստոսին, բայց խանգարեց համավարակի տարածումը: Փոխարէնը, հոգևոր կրթութեան գումարը տրամադրուեց արցախեան պատերազմից տուժածներին, ինչի համար մեծապէս երախտապարտ ենք լեհ ընտանիքների միութեանը:
Յատկապէս, ուզում եմ իմ անունից շնորհակալութիւն յայտնել «Ընտանիքների գարունը» միութեան անդամներին՝ առ այն, որ իրենց աջակցութիւնը ստացան նաև զոհերի և վիրաւորների 6 ընտանիքներ՝ Աշոցքի հայ կաթողիկէ համայնքներից:
Տեղեկատւութեան համար որպէս աղբիւր ծառայեց՝ Լեհաստանի հայ կաթողիկէ համայնքի կայքը
Տ. Յովսէփ Քհն. Գալստեան
Հոգևոր հովիւ Աշոցքի հինգ կաթողիկէ համայնքների
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
