Որոնել

Ֆրանչիսկոս Պապը Հայաստանի մէջ (2016) Ֆրանչիսկոս Պապը Հայաստանի մէջ (2016) 

Արցախի համար Ն. Ս. Ֆրանցիսկոսի խաղաղութեան կոչերը. կարճ վերլուծութիւն

Հռոմի Սրբազան Քահանայապետը՝ որպէս Քրիստոսի Ընդհանրական՝ Կաթողիկէ, Եկեղեցու առաջնորդ, որպէս Վէմ Եկեղեցու, ըստ տէրունական հաստատութեան, որպէս Սուրբ Պետրոս առաքեալի յաջորդ, ունի առաքելութիւն աղօթելու և աշխատելու ամբողջ աշխարհում և բոլոր ազգերի միջև խաղաղութեան, երկխօսութեան և եղբայրական յարաբերութիւնների հաստատման համար

«Ճշմարիտ կրօնական արժէքներ դաւանելը բոլորովին ան համատեղելի է սեփական տեսակէտդ բռնութեան միջոցով ուրիշներին պարտադրելու փորձի հետ՝ օգտագործելով Աստծու սուրբ անունը՝ որպէս զէնք»

Այս կիրակի՝ նոյեմբերի 1-ին Հրեշտակ Տեառն աղօթքն ասելուց յետոյ Ն. Ս. Ֆրանցիսկոս Սրբազան Քահանայապետը դարձեալ անդրադարձաւ արցախեան պատերազմին: Նա ասաց հետևեալը.

 «Չմոռանա՛նք այն ինչ պատահում է Լեռնային Ղարաբաղում, որտեղ իրար են յաջորդում զինուած բախումները՝ դիւրաբեկ հրադադարներով, զոհերի թուի ողբերգական աճով, քաղաքացիական բնակավայրերի, ենթակառուցուածքների և աղօթավայրերի կործանմամբ և քաղաքացիական բնակչութեան աւելի ու աւելի զանգուածային ներգրաւմամբ: Սա ողբերգութիւն է: Ուզում եմ վերստին ի սրտէ դիմել հակամարտութեան պատասխանատու կողմերին, որպէսզի հնարաւորինս շուտ միջամտեն՝ կանխելու անմեղ արեան հեղումը: Թող նրանք չմտածեն բռնութեան միջոցով հակամարտութիւնը լուծելու մասին, այլ նուիրուեն անկեղծ բանակցութիւնների՝ միջազգային հանրութեան աջակցութեամբ: Ես յայտնում եմ իմ մտերմութիւնը բոլոր տառատպեալներին և խնդրում եմ բոլորին դիմել սրբերի բարեխօսութեանը՝ այդ տարածաշրջանում կայուն խաղաղութեան համար աղօթքով». ասել է Նորին Սրբութիւնը:

Յիշեցնեմ, որ արցախեան պատերազմի ընթացքում սա Նորին Սրբութեան երրորդ ելոյթն է և աղօթքը՝ ռազմական գործողութիւնների դադարեցման և խաղաղութեան համար: Առաջին անգամ նա խօսեց պատերազմի երկրորդ օրը՝ սեպտեմբերի 28-ին: Նա կոչ էր արել լուծում գտնել «ոչ թէ բռնութեան և զէնքի միջոցով, այլ՝ երկխօսութեան և բանակցութիւնների» և խնդրել էր աշխարհի բոլոր քրիստոնեաներին՝ իր հետ միասին աղօթել կովկասեան տարածաշրջանում խաղաղութեան հաստատման համար:

Հռոմի Սրբազան Քահանայապետը՝ որպէս Քրիստոսի Ընդհանրական՝ Կաթողիկէ, Եկեղեցու առաջնորդ, որպէս Վէմ Եկեղեցու, ըստ տէրունական հաստատութեան, որպէս Սուրբ Պետրոս առաքեալի յաջորդ, ունի առաքելութիւն աղօթելու և աշխատելու ամբողջ աշխարհում և բոլոր ազգերի միջև խաղաղութեան, երկխօսութեան և եղբայրական յարաբերութիւնների հաստատման համար: Նա մշտապէս համարձակ կերպով խօսում է ընդդէմ բռնութեան, պատերազմների, մարդու իրաւունքների ոտնահարման, շահագործման, ահաբեկչութեան, զէնք արտադրող և վաճառող, պատերազմ սանձազերծող մի խումբ հարուստների տմարդի վարքագծի դէմ, շեշտում է հայրենի հոգևոր և մշակութային արժեգների, ազգային ինքնութեան պահպանութեան սկզբունքները, որոնք հիմնուած են Սուրբ Գրքի և Սրբազան Աւանդութեան վրայ: Քահանայապետն ունի աստուածադիր առաքելութիւն՝ հոգ տանելու երկրի վրայ ապրող իւրաքանչիւր մարդ արարածի մասին՝ անկախ կրօնից և ազգութիւնից, արդար կամ ամբարիշտ նկարագրից, սէր գործադրելու և քարոզելու իւրաքանչիւրի՛ հանդէպ՝ ըստ Տիրոջ պատուիրանների և Աւետարանի տրամաբանութեան:

2016-ին իր կովկասեան տարածաշրջան կատարած այցելութիւնը Նորին Սրբութիւնը սկսեց Հայաստանից, որտեղ ծաւալուն կերպով խօսեց խաղաղութեան մասին և աւարտեց Ադրբեջանում, որտեղ, իր խօսքն ուղղելով Իլհամ Ալիևին և Ադրբեջանի քաղաքական, կրօնական ղեկավարութեանը, ասաց հետևեալը. «Ճշմարիտ կրօնական արժէքներ դաւանելը բոլորովին ան համատեղելի է սեփական տեսակէտդ բռնութեան միջոցով ուրիշներին պարտադրելու փորձի հետ՝ օգտագործելով Աստծու սուրբ անունը՝ որպէս զէնք»:

Վստահ եմ, որ Իլհամ Ալիևը և Ադրբեջանի քաղաքական վերնախաւը ոչինչ չքաղեցին մեծ խաղաղասէրի այդ ելոյթից և ակնարկներից, ինչպէս այսօր էլ շարունակում են չլսելու տալ ոչ միայն Նորին Սրբութեան խաղաղասիրական կոչերը, այլեւ իրենց սեփական ժողովրդի ողբալի աղաղակը: Ցաւօք, Սրբազան Քահանայապետի կոչերին անհաղորդ են մնում նաև աշխարհի աւելի մեծ խաղացողները, որոնք հետևում են միայն իրենց պատեհական շահերին և հաշուարկներին: Պետրոսի յաջորդի ձայնը մնում է որպէս «ձայն բարբառոյ յանապատի», որը ոչ ոք չի ուզում լսել, քանի որ ճշմարտութիւնը միշտ դառն է կեղծիքի մէջ ապրողների համար:

Սրբազան Քահանայապետի կովկասեան տարածաշրջանում խաղաղութեան կառուցելու յոյսը կապուած է հայ երիտասարդութեան հետ. միայն նրանք կարող են հասկանալ նոյնիսկ թշնամուն ներելու աւետարանական վսեմ և աստուածադիր սկզբունքը: 2016-ի յունիսի 26-ին, Երևանի հրապարակում, Ն. Ս. Ֆրանցիսկոսը հայ երիտասարդներին յիշեցրեց Սուրբ Գրիգոր Նարեկացու տողերը.

 «…Ուզում եմ յիշել Քրիստոսի խաղաղութեան մեծ վկային և գործչին՝ սուրբ Գրիգոր Նարեկացուն, որին Եկեղեցու Վարդապետ հռչակեցի: Նա կարող էր յայտարարել նաև «Խաղաղութեան Վարդապետ»: Նա այսպէս է գրել այդ արտասովոր Գրքում, որ սիրում եմ անուանել որպէս «հայ ժողովրդի հոգևոր սահմանադրութիւն». «Յիշի՛ր, [Տէր,…] նրանց, ովքեր մարդկային ցեղում մեր թշնամիներն են, սակայն նրանց բարիքի համար. նրանց մէջ իրագործիր ներում և ողորմութիւն […] Մի՛ վերացնիր նրանց, ովքեր ինձ կծոտում են. կերպարանափոխի՛ր: Արմատախիլ արա՛ աշխարհիկ ախտաւոր ընթացքը և տնկիր բարին իմ և նրանց մէջ» («Մատեան ողբերգութեան», 83, 1-2): Նարեկացին … դարձաւ «ամբողջ աշխարհի աղօթամատոյցը» (Նոյն, 28,2): Նրա այսպիսի ընդհանրական զօրակցութիւնը մարդկութեան հետ քրիստոնէական մեծ պատգամ է խաղաղութեան, ներդաշնակ ճիչ, որ բոլորի համար ողորմութիւն է հայցում: Տարբեր երկրներում ներկայ հայերը, որոնց եղբայրաբար գրկում եմ այստեղից, այս հաղորդութեան իղձին թող լինեն պատգամաբերներ: Ողջ աշխարհը ձեր այս քարոզութեան կարիքն ունի, ձեր ներկայութեան կարիքն ունի, ձեր ամենաջինջ վկայութեան կարիքն ունի: Խաղաղութիւն բոլորին»:

Հետևաբար, լաւ ըմբռնելով Ընդհանրական Եկեղեցու առաջնորդի առաքելութիւնն ու դերը՝ մարդկային հասարակութեան և փրկագործութեան աստուածային տնօրինութեան մէջ, վստահ ենք, որ Արցախում և Հայաստանում իր զաւակի կորուստը սգացող իւրաքանչիւր մօր արտասուքը նաև նրա՛ արտասուքն է՝ որպէս հոգևոր հօր և Քրիստոսի առաքելութեան շարունակողի, իւրաքանչիւր արկ, որ պայթում է Արցախում, պայթում է նաև նրա՛ սրտում, իւրաքանչիւր հայի փափագը՝ յաղթանակի, արցախցու կեանքի անվտանգութեան պաշտպանութեան և խաղաղութեան հաստատման նախևառաջ նրա՛ փափագն է:

 Լայնախոհ և անկեղծ աղօթքով միանա՛նք Քահանայապետի աղօթքներին:

Տ. Յովսէփ Գալստեան

Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ

02/11/2020, 07:46