Որոնել

Vatican News
Գարեգին Բ Ամենայն Հայոց Կաթողիկոս Գարեգին Բ Ամենայն Հայոց Կաթողիկոս 

Ամենայն հայոց Գարեգին Բ. կաթողիկոս. «Քաջաբար ելէք հայրենիքի ու ազգի պաշտպանութեան նուիրական պայքարի»

Ամենայն հայոց Գարեգին Բ. կաթողիկոսին կողմէ հայ ժողովուրդին ուղղուած ուղերձը

Ամենայն Հայոց Գարեգին Բ. կաթողիկոսը հայ ժողովուրդին կոչ ուղղած է ելլելու հայրենիքի ու ազգի պաշտպանութեան նուիրական պայքարին, կանգնելու սահմանագիծին մարտնչող քաջորդիներուն կողքին, որպէսզի պարտութեան մատնուի նենգ թշնամին, խորտակուին անոր չար մտադրութիւնները եւ աւելի հզօրանայ հայրենի մեր երկիրը, մեր պետականութիւնը:

Ամենայն հայոց Գարեգին Բ. կաթողիկոսին կողմէ հայ ժողովուրդին ուղղուած ուղերձը` ստորեւ.

«Սիրելի՛ զաւակներ մեր, մեր ազգի ու հայրենիքի համար վճռորոշ այս պահին հերթական անգամ հայրապետական մեր ուղերձն ենք յղում ձեզ: Այսօր աշխարհասփիւռ մեր ժողովուրդը ամէնուր իր կարողութիւնն ու ներուժն է ներդնում` յանուն արցախահայութեան ազատ ու անկախ կեանքի մեր սրբազան պայքարում: Մեր քաջարի զինուորները, ապաւինած Տիրոջ զօրութեանը եւ մեր տաճարներում մատուցուող աղօթքներին, շարունակում են խիզախութեամբ դիմագրաւել եւ հակահարուած հասցնել թշնամուն` ամուր գիտակցութեամբ, որ յաղթանակն է երաշխիքն ու գրաւականը Արցախի Հանրապետութեան անվտանգութեան ու անսասանութեան:

«Մեր հայրերը համբերել են նեղութիւնների, արիութեամբ հեռու են վանել վախն ու յուսահատութիւնը, մահուանը յաղթել Քրիստոսի Յարութեան շնորհով ու հաւատով եւ կերտել փառապանծ յաղթանակները հայրենի մեր երկրի: Ճշմարիտ է ասուած. «Քաջերի սերունդները քաջերն են»: Այսօր քաջերի մեր նոր սերունդն է հերոսանում նոյն ոգով եւ նախնեաց լուսավառ օրինակով` յանձնառու նուիրաբերել նաեւ անգին կեանքը մեր ժողովրդին եւ հայրենիքին: Նոյն քաջութիւնն ու հերոսութիւնը դրսեւորում են նաեւ հայոց բանակին խիզախ մարտիկներ պարգեւած սիրասուն ծնողները: Խոնարհում եւ երկնառաք օրհնութիւն մեր զինուորների եւ աշխարհազօրայինների ընտանիքներին, թանկագին մայրերին ու հայրերին: Մեր բարձր գնահատանքն ու աղօթքը մեր ժողովրդին զօրավիգ ազգային փոքրամասնութիւնների ներկայացուցիչներին եւ հայ զինուորի հետ կողք- կողքի մարտնչող նրանց զաւակներին:

«Այսօր Ազրպէյճանի կողմից մեզ պարտադրուած պատերազմը, ժխտական կեցուածքը մարդասիրական հրադադարի հանդէպ, վերջնագրային դիրքորոշմամբ բանակցութիւնների խափանումը, Արցախի բնակավայրերի ու բնակչութեան հրետակոծումը եւ պատճառած բազմաթիւ աւերներն ու մարդկային կորուստները, Արցախի հարցը ռազմական ուղիով վճռելու նկրտումները, ինչպէս նաեւ վերջին տասնամեակների պատմութիւնը բաւարար են փաստելու, որ Արցախը չի կարող որեւէ կարգավիճակով լինել Ազրպէյճանի կազմում: Մեր գոյութեան առջեւ ծառացած սպառնալիքը մեզ այլ ընտրութիւն չի թողնում, քան կենաց ու մահու պայքարով պաշտպանել Արցախի մեր ժողովրդի ազատ ու անկախ կեանքի իրաւունքը եւ վերահաստատել խաղաղութիւնը, յատկապէս երբ աշխարհը դեռ յապաղում է դատապարտել թշնամու ոճրագործութիւններն ու վայրագութիւնները: Խաղաղութեան ու ազատութեան ձգտումներում մեզ աջակից է Աստուած, ով մեր հոգու եւ հաւատքի զօրութեամբ, ինչպէս առաքեալն է ասում, Քրիստոս Յիսուսով յաղթութիւն պիտի պարգեւի:

«Սիրելի՛ զաւակներ մեր, այս վճռական պահին մեր կոչն ենք ուղղում ձեզ` քաջաբար ելէք հայրենիքի ու ազգի պաշտպանութեան նուիրական պայքարի, կանգնէ՛ք սահմանագծում մարտնչող մեր քաջորդիների կողքին, որպէսզի պարտութեան մատնենք նենգ թշնամուն, խորտակենք նրա չար մտադրութիւնները եւ առաւել հզօրացնենք հայրենի մեր երկիրը, մեր պետականութիւնը: Այսօր, առաւել քան երբեւէ, մեզ համար հրամայական է համազգային մեր միասնականութիւնն ու համերաշխութիւնը, որպէսզի մեր զաւակաց անձնուրաց քաջութիւնը պսակուի յաղթական աւարտով` խնայելով մարդկային թանկ կեանքեր: Մեր արիութեամբ, մեր կեանքով ու գործով արժանի լինենք մեր հերոս զաւակներին, նրանց փառապանծ ոգուն եւ անմահ սխրանքին: Հայրական մեր պատգամն ենք ուղղում նաեւ հոգեւոր սպասաւորներին, հայոց բանակի գնդերէցներին` քաջալերելու եւ ոգեշնչելու ազգիս զաւակներին հայրենեաց պաշտպանութեան պայքարում, հաւատքով զօրացնելու մեր ժողովրդին եւ աղօթք ու ջանք բերելու մեր ընդհանուր յաղթանակին: Արդ, ազգովի, մէկ սիրտ եւ մէկ հոգի դարձած, միաբան եւ համախումբ կերտենք հերթական յաղթանակը մեր նորագոյն պատմութեան: Եւ ինչպէս որ մենք ենք ոգեշնչւում մեր հերոս նախնիներով եւ առանձնակի հպարտութեամբ արտաբերում պատմահօր խօսքերը, այնպէս էլ գալիք սերունդները պիտի հռչակեն, որ քաջարի սերունդներն են, զաւակները` հերոսական ժողովրդի: Մեր սրտաբուխ աղօթքն է, որ անկոտրում լինեն աշխարհասփիւռ մեր ժողովրդի յաղթանակի կամքն ու վճռականութիւնը, ամուր` թիկունքը, եւ զօրաւոր` ոգին ու բազուկը հայրենեաց պաշտպան զինուորի: Հայցում ենք, որ Բարձրեալ Տէրը պահի, պահպանի ու ազատի մեր ժողովրդին չարի փորձութիւններից, երեւելի եւ աներեւոյթ թշնամիներից եւ շնորհի խաղաղութիւն ու բարօրութիւն մեր հայրենիքին եւ համայն ազգիս հայոց, այսօր եւ յաւիտեան. ամէն»:

Քաղուած «Ազդակ»էն։

27/10/2020, 08:45