Որոնել

Vatican News
Լուրտի Տիրամայրը Լուրտի Տիրամայրը 

Յուլիս 16ին «Վիրթուալ» ուխտագնացութիւն դէպի Լուրտի Սրբավայր

«Եղբայրսիրութիւնը, մեծահոգութիւնը եւ յոյսը, որոնցով արդէն 162 տարի է, ինչ առաջնորդւում է Ուխտավայրը՝ երբեւէ նոյնքան կարեւոր չեն եղել, որքան այսօր»:
Ունկնդրէ լուրը

Յուլիս 16-ին Սուրբ Կոյս Մարիամի տասնութերորդ եւ վերջին երեւման տարելիցի օրն է: Լուրտի Սրբավայրը՝ «Lourdes United» խորագրի ներքոյ, վիրտուալ (անիրական) ուխտագնացութիւն է կազմակերպում եւ համայն աշխարհի հաւատացեալներին հրաւիրում հետեւելու Երեւումների Անձաւից ուղիղ եթերով հեռարձակումներին:

Ի հակադրումն բոլոր ուխտագնացութիւնների չեղարկմանը՝ պայմանաւորուած համաշխարհային առողջապահական ճգնաժամով, Լուրտի Սրբավայրը վերաբացւում է, որպէսզի վերստին ստանձնի այն հոգեւոր փարոսի դերը, որը դէպի իրեն է կանչում ամենակարօտեալներին: Յուլիս 16-ին կայանալիք վիրտուալ ուխտագնացութեան վերաբերեալ Սրբավայրի մամլոյ գրասենեակի կողմից տարածուող հաղորդագրութեան մէջ ասւում է հետեւեալը.  ««Lourdes United»-ը աշխարհի չորս կողմերից միաւորելու է բոլոր նրանց, ովքեր Լուրտի մէջ տեսնում են իրենց հաւատքի, նուիրուածութեան եւ յոյսի ուղեցոյցը»: Տարբեր հաղորդամիջոցների՝ հեռատեսիլի, ռատիոյի եւ սոցիալական ցանցերի օգնութեամբ ուխտաւորները կարող են միանալ այս իւրօրինակ հանդիպմանը:

Յագեցած ծրագիր

Նախատեսւում է պատարագների, արարողական երթերի, Վարդարանի եւ այլ աղօթքների տասնհինգ ժամեայ ուղիղ հեռարձակում: Տեղական ժամանակով ժամը 16:00-ից մինչեւ 18:00-ն անձաւից ուղիղ եթերով կսփռուի հեռատեսիլային հաղորդում, ապա՝ նկարահանման հրապարակի վրայ միմեանց կը յաջորդեն հոգեւոր եւ քաղաքական առաջնորդներ ու գործիչներ, ովքեր կվկայեն, թէ ինչպիսի դեր ունի Լուրտի ուխտավայրը իրենց կեանքում: Սրբավայրի անդրաբեմը նոյնպէս կքօղազերծուի, որպէսզի այս առաքելութիւնն աւելի լաւ մեկնաբանուի հեռուստադիտող-ուխտաւորներին: Երկու ժամ տեւողութեամբ ուղիղ եթերը կը լրացնեն համերաշխութեան, եղբայրսիրութեան, նուիրուածութեան, փոխօգնութեան, յոյսի եւ այս ամէնի մէջ իմաստ որոնելու թեմաներով բազմաթիւ ելոյթները, կը լինեն նաեւ լրահաղորդումներ, արխիւային տեսանիւթեր, երաժշտութիւն, հեռարձակումներ արտերկրի ռատիոկայաններից եւ այլ յիշարժան պահեր:

Շարունակել համերաշխութիւն դրսեւորել

Իր ողջ պատմութեան ընթացքում առաջին անգամ՝ սոյն թուականի մարտ-մայիս ամիսների միջեւ ընկած ժամանակահատուածում ուխտավայրը չէր գործում: Աւելի քան երկու ամիս Լուրտի Սրբավայրը չեղարկել էր բոլոր ուխտագնացութիւնները: Թէեւ այսօր ուխտավայրը մասամբ վերաբացուել է, այնուամենայնիւ, համաձայն առողջապահական խիստ կանոնների՝ կարող է հիւրընկալել սահմանափակ թուով ուխտաւորների: Այսպիսով, Սրբավայրի պաշտօնական կայքէջում նշւում է, որ ըստ կանխատեսումների՝ 320 աշխատակից եւ մշտապէս ուխտաւորների մեծ հոսք ունեցող ուխտավայրն այս տարի գործելու է «ոչ լիարժէք», ինչը կը յանգեցնի 8 միլիոն եւրոյի կորուստի. «Լուրտի կենարար աւազանը մեծ դժուարութիւնների առջեւ է կանգնած»:

Այնուամենայնիւ, Սրբավայրի հոգեւոր առաքելութիւնը կանգ չի առել. «Հարիւր հազարաւոր հաղորդագրութիւններ, օգնութեան խնդրանքներ, տառապանքի ճիչեր, բայց նաեւ յոյսի վկայութիւններ շարունակում են հասնել Լուրտ՝ աղօթքի բաբախող սրտին»:

Սովորաբար, ամէն տարի, Լուրտը հաւաքագրում է մօտաւորապէս 100 000 կամաւորի, որպէսզի կարողանան ընդունել 3 միլիոն ուխտաւորների եւ այցելուների՝ ի թիւս որոնց աւելի քան 50 000 հիւանդներ եւ հաշմանդամութիւն ունեցող անձինք, ովքեր ժամանում են աշխարհի տարբեր կողմերից:

Լուրտի Սրբավայրի մամլոյ գրասենեակի հաղորդագրութիւնը եզրափակւում է հետեւեալ խօսքերով. «Եղբայրսիրութիւնը, մեծահոգութիւնը եւ յոյսը, որոնցով արդէն 162 տարի է, ինչ առաջնորդւում է Ուխտավայրը՝ երբեւէ նոյնքան կարեւոր չեն եղել, որքան այսօր»: 

Թարգմանեց՝ Հրանուշ Սարգսեանը

11/07/2020, 07:30