Կարդինալ Լուիս Ռաֆայէլ Սաքոյի կոչը՝ օգնելու Նինուէ նահանգի բնակչութեան:
Վազգէն Աբարդեան - Վատիկան
Քաղդէացիներուն Պատրիարք,Կարդինալ Լուիս Ռաֆայէլ Սաքօ կոչով մը դիմած է եկեղեցական, պետական, ընկերային հաստատութիւններուն խնդրելով, որ օգնեն Նինուէ նահանգի բնակիչները՝ իրենց բնակարաններուն մէջ մնալու համար, օգնեն նաեւ Նինուէ նահանգէն գաղթած մարդոց՝վերադառնալու համար իրենց հայրենիքը:
Պատրիարքը կոչին մէջ նկատել տուած է, որ Իրաքի մէջ ՏԱՀԵՇ-ի պարտութիւնը չի նշանակեր, որ պէտք չէ օգնել տարածաշրջանին բնակիչները: Ընդհակառակը կարիքը կայ աշխատանք տանելու, որպէսզի երիտասարդները մնան եւ յարատեւեն իրենց հայրենիքին մէջ:
Պատրիարք Սաքօ միջազգային կազմակերպութիւններէն եւ եկեղեցական հաստատութիւններէն խնդրած է, որ թիկունք կանգնին Նինուէ նահանգի մէջ հաստատուած ընտանիքներուն, վերականգնելով տարածաշրջանին հիւանդանոցներն ու դպրոցները ինչպէս նաեւ քաջալերելով գիւղատնտեսական, անասնապահական ծրագիրները:
Կոչին աւարտին Պատրիարք Լուիս Ռաֆայէլ Սաքօ աշխարհի բոլոր քրիստոնեաները հրաւիրած է որ յիսնակաց շրջանին աղօթեն Իրաքի համար՛ յատուկէն Նինուէ նահանգի բնակչութեան համար:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ