Святы Пасад: семінар аб сакрамэнце споведзі для новых святароў
Аляксандр Панчанка - Vatican News
Семінар прапануе паглядзець на галоўныя тэмы, звязаныя з тэмай сакрамэнту споведзі, з міждысцыплінарнай перспектывы. У прыватнасці будуць закранацца далікатныя і складаныя сітуацыі, з якімі спаведнікі сустракаюцца ў сваім служэнні ў наш час. Прымаць удзел у курсе магчыма з дапамогай відэасувязі.
Сярод тэм форума: важнасць споведзі для аднаўлення надзеі, кампетэнцыі Апостальскай пэнітэнцыярыі, нерэгулярныя сітуацыі і перашкоды для атрымання сакрамэнтральнага прабачэння, правы і абвязкі спаведнікоў і пэнітэнтаў, дапамога вернікам у выпадках апантанасці і духоўнае суправаджэнне, станоўчыя аспекты і пагрозы штучнага інтэлекту, практычныя аспекты споведзі.
З дакладамі выступяць ватыканскія і міжнародныя эксперты, сярод якіх: кардынал Маўра Пьячэнца, Вярхоўны пэнітэнцыярый, маньсеньёр Кшыштаф Нікель, рэгент Апостальскай пэнітэнцыярыі, арцыбіскуп Рына Фізікела, прапрафект Дыкастэрыі па справах евангелізацыі, мансеньёр Віторыа Франчэска Віола, сакратар Дыкастэрыі па справах Божага культа і Дысцыпліны сакрамэнтаў, ксёндз Фабіа Разіні, кіраўнік службы душпастырства пакліканняў Рымскай дыяцэзіі і іншыя дасведчаныя святары. Пасля кожнай сесіі прадугледжаны дыскусіі.
8 сакавіка ўдзельнікаў семінара прыме на прыватнай аўдыенцыі Святы Айцец.
