Напярэдадні Сінода Біскупаў у Рыме сустрэліся маладыя журналісты
Марыя Валодзіна - Vatican News
Куратарам праграмы выступіла ватыканская Дыкастэрыя па камунікацыі. Ініцыятыва накіравана на папулярызацыю лепшых практык у сферы духоўнага выхавання. Яна імкнецца натхніць маладых журналістаў на пошук новых і эфектыўных спосабаў абвяшчэння Евангелля ў віртуальным свеце.
Удзельнікі сустрэчы – 16 хлапцоў і дзяўчат, якія працуюць у сферы камунікацыі – сустрэліся ў Рыме пасля некалькіх месяцаў анлайн-заняткаў. У Вечным горадзе іх чакала насычаная праграма: наведванне чатырох Папскіх базілік, Ватыканскага радыё і Ватыканскіх музеяў.
Напрыканцы агульнай аўдыенцыі, якая прайшла 27 верасня 2023 года на плошчы святога Пятра, маладых журналістаў прывітаў Францішак. 30 верасня яны бралі ўдзел у экуменічным малітоўным чуванні Together, якое прайшло напярэдадні XVI Звычайнай Асамблеі Сінода Біскупаў.
На думку Летысіі Араўха з Бразіліі, асістэнта па камунікацыі руху Laudato si', сустрэча з калегамі з розных рэгіёнаў свету дала ім "магчымасць вучыцца адзін у аднаго”.
Па словах супрацоўніка прэс-службы Сайгонскай архідыяцэзіі Там Буі з В'етнама, гэтая магчымасць “надзвычайна ўзбагачае”, дазваляе ўмацаваць узаемаразуменне і абмяняцца ведамі па такім тэмам, як камунікацыя, літургія, моладзь і іншыя. Ён таксама падзяліўся досведам арганізацыі малітоўнага чування ў сваёй дыяцэзіі.
Журналіст-фрылансер з Нігерыі Эмануэль Данатус адзначыў, што сустрэча натхніла яго на працу і звярнула ўвагу на такія пытанні, як важнасць слухання і неабходнасць заўсёды паведамляць праўду.
